Home
Agad umanong maghahanda para sa mas mabigat na hamon ng international pageant ang kinoronahang Miss Earth Philippines 2013 na si Angelee delos Reyes.
Si Delos Reyes ay 25-anyos na kandidatang nagmula sa Olongapo City at kasalukuyang marketing head ng isang kompaniya.
Para sa bagong Miss Earth Philippines, hindi simple ang pagsabak sa malalaking patimpalak lalo na kung ang buong bansa ang kaniyang kakatawanin.
Bukod kay Delos Reyes, nakuha naman ni Miss Nagcarlan, Laguna Kimverlyn Suiza ang Miss Philippines Earth Air.
Napunta kay Miss Zamboanga City Nancy Leonard ang Miss Philippines Earth Water.
Iniuwi ni Miss Philippines Community of West Coast USA Alma Cabasal ang Miss Fire.
Habang napasakamay naman ni Miss Sta. Maria, Bulacan Bernadette Mae Aguirre ang Miss Philippines Earth Eco Tourism title.
Ginanap ang event sa Arena, Pasay City, Metro Manila.
Tinuldukan na ng Alaska Aces ang tatlong taong title drought makaraang tanghaling 2013 PBA Commissioner’s Cup champion.
Na-sweep ng Aces ang Barangay Ginebra, 3-0, sa kanilang best of five series, makaraang tambakan sa Game 3 ngayong gabi, 104-80.
Bagama’t nakakalamang ang Ginebra sa halos kabuuan ng laro, ginulat ng Aces ang kalabang koponan nang magtala ng 33-6 run sa fourth quarter.
Sa nalalabing 3:03 minuto sa fourth quarter, lumalamang na ang Alaska, 96-79, at binigyan ng 8-1 run ang kalaban upang makuha ang kampeonato.
Ang pitong straight points ni JVee Casio sa kalagitnaan ng fourth quarter ang nagbigay buhay sa Aces habang sumali rin sa scoring frenzy sina Sonny Thoss at Calvin Abueva.
Nagtala ng double-double performance ang import ng Aces na si Rob Dozier sa kaniyang 27 points at 20 rebounds bukod pa sa pitong assists at anim na blocks.
Itinanghal naman bilang Finals MVP si Thoss na mayroong 13 points at 14 rebounds.
Nag-ambag ng 18 points si Casio habang sinubukan naman ni Mark Caguioa na makabawi ang Kings subalit bigo ang mga 3-point attempts nito.
Pinangunahan ng Best Player of the Conference na si LA Tenorio ang Kings sa kaniyang 18 points.
Ito ang unang titulo para sa Aces simula nang kanilang mapanalunan ang 2010 PBA Fiesta Cup Conference.
Bagama’t positibo pa ring maaayos ang gusot sa pagitan ng Pilipinas at Taiwan, tiniyak naman ng ilang opisyal na kabilang sa kanilang ikinokonsedera ang posibilidad na ilikas ang mga mangagawang Pinoy sa naturang bansa.
Ayon kay Manila Economic and Cultural Office (MECO) chairman Amadeo Perez Jr., binigyan na sila ng direktiba ni Pangulong Benigno “Noynoy” Aquino III na asikasuhin ang kapakanan ng mga overseas Filipino workers (OFWs).
Katunayan, bumuo na umano ng isang task force para tumutok sa kalagayan ng mga Pinoy, lalo na ang mga naaapektuhan ng panggigipit ng ilang Taiwanese.
Kinumpirma na rin ng MECO ang ulat ng pang-aatake sa dalawang OFW dahil lamang sa pagiging Filipino ng mga ito.
Nag-ugat ang tensyon matapos aksidenteng mapatay ng Philippine Coast Guard (PCG) ang isang iligal na mangingisda sa karagatang sakop ng Pilipinas.
SEOUL, South Korea – Panibagong probokasyon ang ginawa ng North Korea, matapos ang paglunsad kahapon ng tatlong short-range missile.
Ayon sa South Korean Defense Ministry, nagpakawala muli ng short-range missile sa eastern waters nito ang Pyongyang, nitong hapon lamang.
Maalala na kahapon, tatlong short-range missile ang pinakawalan ng North Korea sa east coast din nito dahilan upang mag-alerto ang Seoul maging ang Japan.
Ang ginawang ito ng Hilagang Korea ay kinondena ng South Korea at hinimok ang Pyongyang na makipagdayalogo.
Ayon naman sa Amerika, nakamonitor sila sa sitwasyon ngayon sa Korean peninsula.
Ikinaalarma naman ni United Nations Secretary General Ban Ki-moon ang sunod-sunod na paglunsad ng missile ng Pyongyang.
Ayon kay Ban, ang ginawang ito ng North Korea ay provocative action. (Reuters)
Iniimbestigahan na ng local health officials ang pagkaka-food poison ng tinatayang 50 kabataan sa lungsod ng Davao nitong Linggo ng umaga.
Ayon sa Department of Health (DoH), kukunan ng sample ang dumi ng mga biktima para malaman ang puno’t-dulo ng pagkakasakit ng tiyan ng mga ito.
Maging ang mga natirang puto at ginamit na kasangkapan sa paggawa nito ay sasailalim din sa pagsusuri.
Sinasabing nasa pagitan ng lima hanggang siyam na taong gulang ang mga batang naisugod sa pagamutan.
Nabatid na gawa sa kamoteng kahoy ang mga puto na nakain ng mga biktima.
Pahuhupain muna ng Pilipinas ang galit ng Taiwan bago ayusin ang tensyon sa pagitan ng dalawang bansa kasunod ng pagkamatay ng Taiwanese fisherman na nabaril ng Philippine Coast Guard.
Sinabi ni Manila Economic and Cultural Office (MECO) chairman Amadeo Perez na lalong nagpapakomplikado sa usapin ang “one-China” policy ng Pilipinas at komento ng mga Taiwanese investigators na murder ang pagkamatay ng kanilang kababayan.
Ayon kay Perez, pinayuhan siya ng secretary general for Asian affairs ng Taiwan na hintayin ang tamang pagkakataon kung kailan humupa na ang emosyon ng mga Taiwanese.
Napaka-emosyunal aniya ng mga Taiwanese at pinapalaki pa ng media sa nasabing bansa ang pagkamatay ng mangingisda.
Sa kabila nito, sinabi ni Perez na nananatiling aktibo ang linya ng komunikasyon nila ng Taiwanese Foreign Ministry sa kabila ng kontrobersiya.
Sa ngayon aniya ay patuloy pang pinag-aaralan ng Justice Department ang hirit ng Taipei na joint investigation sa insidente.
Hiniling ngayon ng Palasyo sa mga Pinoy sa Taiwan na limitahan muna ang paglabas sa kanilang mga tinitirhan.
Ito’y sa gitna ng napapaulat na pagmamaltrato sa mga overseas Filipino workers (OFWs) ng galit na mga Taiwanese kasunod ng pagkamatay ng kababayan nilang mangingisda na nabaril ng Philippine Coast Guard.
Una rito ay may napaulat na isang Pinoy ang binawian ng buhay sa ospital sa Taiwan makaraang hinampas ng Taiwanese ng baseball bat habang naglalakad mula sa trabaho.
Ayon kay Deputy Presidential Spokesperson Abigail Valte, naiparating na ni de facto Philippine representative to Taiwan Antonio Basilio na naiparating na sa mga Pinoy sa Taiwan ang tulong na handang ipagkaloob ng gobyerno sa kanila.
Una na ring tiniyak ni Taiwan President Ma Ying-jeou ang kaligtasan ng mga Pinoy sa Taiwan.
Samantala inihayag ng Malacañang na sa ngayon hindi pa naman napag-uusapan kung magpapataw din ng sanction ang Pilipinas laban sa Taiwan.
Sa ngayon ayon kay Valte, hindi pa natatalakay ang usapin sa sanction.
Napag-alaman na kasunod ng pagkamatay ng kanilang kababayan, pinatawan ng sanction ng Taipei ang Pilipinas kagaya ng pagpalabas ng red travel alert laban sa Manila, pagsuspinde sa pagbigay ng working permit sa mga OFWs.
INDIANAPOLIS – Pasok na sa Eastern Conference finals ang Indiana Pacers, makaraang talunin ang New York Knicks sa Game 6 ng second-round playoffs, 106-99.
Ito ang unang paglaro sa conference finals ng Pacers simula noong 2004.
Ang block ni Roy Hibbert sa dunk ni Carmelo Anthony sa kalagitnaan ng fourth quarter ay sinundan ng 11-2 run para sa Indiana upang tuluyang madispatsa ang Knicks.
Umiskor ng career-high 25 points si Lance Stephenson upang pangunahan ang Pacers habang nagtala naman ng 23 puntos si Paul George at 21 points si Hebbert.
Humakot ng 39 points si Anthony subalit bigong mapalawig ang serye sa Game 7.
Si Iman Shumpert ay may 19 points kung saan nakagawa ito ng tatlong 3-pointers habang si J.R. Smith ay may 15 puntos para sa Indiana.
Kasunod ng panalo ng Pacers, dumagundong naman sa buong Bankers Life Arena ang mga sigaw na “Beat the Heat!”
Makakaharap ng Pacers sa Eastern Conference Finals ang NBA defending champion na Miami Heat.
SEOUL, South Korea – Tumanggi ang Amerika na direktang magkomento sa paglunsad ng North Korea ng tatlong short-range missiles kahapon.
Gayunpaman tiniyak ng Washington na nakamonitor ito sa sitwasyon sa Korean peninsula.
Sinabi ng US State Department sa inilabas na statement na patuloy silang umaapela sa Pyongyang na tigilan ang mga probokasyon at gumawa ng hakbang upang mapabuti ang relasyon sa mga karatig bansa.
“We continue to urge North Korea to exercise restraint and take steps to improve its relations with its neighbors,” ayon sa US State Department.
Ayon naman sa British Foreign Office, nilinaw na ng international community sa North Korea na wala itong mapapala sa pagbabanta sa international community at paggawa ng tensyon sa rehiyon.
“We have been clear to North Korea that its long-term interests will not be served by threatening the international community and increasing regional tensions,” ayon sa UK Foreign Office.
Una rito sinabi ng South Korean Defense Ministry na naglunsad ng tatlong short-range missile kahapon ang Hilagang Korea sa eastern coast ng bansa.
Nakaalerto ngayon ang Timog Korea sa anumang probokasyon na gagawin ng Pyongyang.
“North Korea fired short-range guided missiles twice in the morning and once in the afternoon off its east coast,” ayon sa tagapagsalita ng South Korean Defense Ministry.
“In case of any provocation, the ministry will keep monitoring the situation and remain on alert.”
Samantala, sinabi naman ng Japan na namonitor nila ang paglunsad ng missile ng North Korea pero wala umano sa mga ito ang tumama sa territorial waters ng Japan. (Reuters)
TAIPEI, Taiwan – Gusto rin umano ng Taiwan na maresolba kaagad ang sigalot nila ng Pilipinas kaugnay sa pagkamatay ng Taiwanese fisherman na nabaril ng Philippine Coast Guard.
Sa National Security Council meeting na isinagawa ng Taiwan kaugnay sa insidente, sinabi ng tagapagsalita ni Taiwanese President Ma Ying-jeou na si Garfie Li na dapat maayos sa lalong madaling panahon ang anumang hindi pagkakaunawaan ng dalawang bansa.
Subalit iginiit pa rin ng Taiwan na kailangan ang joint investigation sa insidente.
Napag-alaman na umuwi na ng Taipei kahapon ang investigating team na ipinadala ng Taiwan sa Manila dahil sa pang-iisnab umano ng gobyerno ng Pilipinas.
Ayon kay Pres. Ma, kailangang sabay na tingnan ng dalawang bansa ang insidente sa praktikal na paraan para lumabas ang katotohanan.
Dagdag pa ng Taiwan leader, magandang pagkakataon na rin ito para masubukan ang mutual judicial assistance agreement sa pagitan ng Taipei at Pilipinas.
Inatasan ni Ma ang justice at foreign ministries ng Taiwan na patuloy na makipagnegosasyon sa Pilipinas para maresolba ang tensyon.
