Home
Apektado ng low pressure area (LPA) at intertropical convergence zone (ITCZ) ang ilang bahagi ng bansa kaya posibleng hindi makita ang annual solar eclipse.
Ayon sa Pagasa, bagama’t kaninang madaling araw pa ito nag-umpisa, natatakpan naman ng makapal na kaulapan kaya hindi gaanong makita ng mga nag-aabang sa iba’t-ibang bahagi ng ating bansa.
Kabilang sa mga makakasaksi ng astronomical event na ito ang Pilipinas, China, Russia, Indonesia, iba pang bahagi ng Southeast Asia, Hawaii, Arctic regions at North America.
Paliwanag ng mga eksperto, sa panahon ng solar eclipse ay dumadaan ang buwan sa pagitan ng mundo at araw.
Dahil dito, natatakpan ang direktang sikat ng araw sa ilang bahagi ng daigdig.
Pero sa Pilipinas ay nasasaksihan ang kaganapang ito bilang partial solar eclipse lamang.
Tiniyak ng Pangulong Noynoy Aquino na hindi nito gagamitin ang resources ng gobyerno para ma-convict si Supreme Court (SC) Chief Justice Renato Corona.
Magugunitang pinupulaan ang pakikipagpulong ng Pangulo sa ilang mga senador at pinakahuli dito ang meeting ni Executive Sec. Jojo Ochoa sa mga bumubuo ng prosekusyon na nagsadya sa Malacañang.
Sinabi ng Pangulo sa Bombo Radyo, hindi na siya magtaka kung kukulayan ang kanyang pakikipag-usap sa mga mambabatas dahil sa nagpapatuloy na impeachment trial laban kay Corona.
Ayon sa Pangulo, hindi rin maiwasang makausap nito ang mga kongresista para i-follow-up ang mga mahahalagang panukala tulad ng sin tax bill na nakabinbin sa Kongreso.
Una ng lumabas na sinusuhulan umano ng Malacañang ang mga senagtor-judges para matiyak ang Corona conviction bagay na itinanggi ng Pangulong Aquino mismo.
“Hindi ho pwedeng… Meron hong actually mekanismo ‘yung tinatawag na LEDAC. Meron hong sin tax, ‘yung tax magmumula sa Kongreso, ano. ‘Yung pagpasa nito pwedeng mag-concur, mag-amyenda ang Senado. Pwede ho ba habang
Tuloy na tuloy na umano ang concert ng pop diva na si Lady Gaga sa kabila ng malawakang pagbatikos sa kaniyang mga pagtatanghal at maging sa kaniyang mga music video.
Ito ang inihayag ng organizers ng kaniyang concert na gagawin sa Lunes at Martes, Mayo 21 at 22, 2012 sa Mall of Asia, Pasay City.
Bandang alas-7:30 nitong gabi ng Sabado ng dumating ang kontrobersyal na pop star sa Ninoy Aquino International Airport (NAIA).
Agad naman siyang tumuloy sa isang hotel sa lungsod ng Makati para makapaghanda sa nalalapit na pagtatanghal.
Una rito, bumuwelta ang mga producers ng concert dahil sa rally ng mga bumabatikos.
Napag-alaman kasi na pinapatigil pa ng mga religious at civil society groups ang naturang event dahil umano sa masamang impluwensiya ng singer at pagyurak nito sa kultura ng mga Pinoy.
Kabilang sa pinupuna ang mapangahas umanong pananamit, concert scenes at anti-Christian daw na lyrics ng mga awitin ng singer.
Subalit ayon sa Ovation Productions na siyang producer ng concert, overreacting lang ang mga grupong ito.
Wala rin umanong karapatan ang mga tutol kay Lady Gaga na pigilin ito sa pagtatanghal dahil lamang sa kagustuhan ng iilan dahil dumaan naman sila sa tamang proseso ng pagkuha ng permit at iba pang requirements.
Naniniwala ang Pangulong Noynoy Aquino na bumubuti ang kalagayan ng Philippine media.
Magugunitang kamakailan lamang ay inupukan ng Pangulo ang umano’y hindi pagiging patas ng mga mamamahayag sa bansa.
Sa kanyang talumpati, sinabi ng Pangulo na mistulang pinaiiral ng mga mamamahayag ang ‘crab mentality’ at hinihila pababa ang bansa, imbes na ipagmalaki ang mga magagandang balita.
Humirit din ng Pangulo na mas pinagtutuunan pa ng media ang kanyang ‘lovelife’ imbes na ibalita ang mga accomplishments.
Sa panayam ng Bombo Radyo, diretsahang sinabi ng Pangulo na sa kanyang pagtingin, nag-iimprove na kumpara sa dati.
Hindi na pinalawig ng Pangulo ang kanyang ibig sabihin.
“Nag-i-improve ‘pag nakikita ko si Mr. Basbaño,” ani Pangulong Aquino sa Bombo Radyo.
Patuloy na magiging makulimlim hanggang sa may manaka-nakang pagbuhos ng ulan sa Luzon, Visayas at Mindanao hanggang sa pagpasok ng susunod na linggo dahil sa dalawang namumuong sama ng panahon.
Ayon sa Pagasa, namataan ang low pressure area (LPA) base sa satellite and surface data sa layong 320 kilometro sa silangan ng Mindanao (8.9 °N, 129.4°E).
Nakapaloob umano ito sa intertropical convergence zone (ITCZ) na umaabot mula Palawan, Visayas at Mindanao.
Ito rin umano ang nagiging dahilan ng malakas na pag-ulan sa Metro Manila at mga karatig na lugar sa Luzon.
Bukod dito, ang dulo ng isa pang LPA ay naghahatid din ng mga kaulapan sa hilagang bahagi ng Luzon.
Tatlong araw bago ang kanyang pagsalang sa witness stand sa impeachment court, muling dumalo sa Consecration Prayer of Octave Novena sa Supreme Court (SC) si Chief Justice Renato Corona at ang kanyang pamilya.
Maliban sa pamilya ng punong mahistrado, dumalo rin sa novena ang mga taga-suporta nito at iba pang opisyal ng Supreme Court.
Bukas magtatapos ang siyam na araw na novena.
Tumanggi namang magpaunlak ng panayam si Corona maging ang kanyang misis na si Cristina sa halip sinabing abangan na lamang ang pagtestigo ng punong mahistrado sa araw ng Martes, Mayo 22 sa Senado.
Umaasa ang pamilya Corona na pakikinggan ng publiko ang magiging testimonya ng chief justice bago husgahan.
Magtutungo rin sa Senate impeachment court ang pamilya Corona at mga kaalyado nito para magpaabot ng suporta sa nililitis na punong mahistrado.
Una rito, kumalat ang ilang text message na ngayong araw sana naka-booked ng eroplano ang mga Corona at sasakay umano ng Qatar airline patungo ng Spain para tumakas. Bagay na inalmahan ni Mrs. Corona na bahagi na naman daw ito ng black propaganda laban sa kanila.
LOS ANGELES – Kung pagbabatayan ang mga independent polls ng iba’t-ibang news websites sa Amerika, masasabing malakas ang tsansa ng Filipino-Mexican-American finalist na si Jessica Sanchez na tanghaling American Idol ngayong taon.
Isang araw matapos madetermina na sina Phillip Phillips at Jessica Sanchez ang maghaharap sa finale, humahataw ngayon sa botohan ang young singer, kung sino ang gusto ng Amerika na maging bago nilang American Idol.
Mas pinapaboran si Sanchez na karapat-dapat sa naturang titulo, kumpara kay Phillips.
Sa Hollywood Gossip poll, 70.6 percent ang pinili si Sanchez habang 29.4 percent ang nagsabing si Phillips ang dapat na manalo.
Batay sa online poll ng HollywoodLife, 60.72 porsiyento ang bomoto kay Sanchez na gustong maging American Idol habang 39.28 percent para sa pawnshop worker na si Phillips ng Georgia.
Sa poll naman ng Mix931fm sa US, si Sanchez ang pinili ng 57.69 percent ng mga bomoto na maging American Idol winner habang 42.31 percent lang ang nagsabing si Phillips ang dapat na manalo.
Sa darating na Miyerkules ay mangyayari ang showdown nina Sanchez at Phillips habang sa Huwebes tatanghalin ang magiging bagong American Idol winner.
Itatampok sa finale show ang performances nina Rihanna, American Idol Season 10 winner Scotty McCreery, ang banda ni AI judge Steven Tyler na Aerosmith at iba pang mga surprise performers.
Hindi na pinayagan ni Kobe Bryant na mawala pa sa kanilang kamay ang panalo ng Los Angeles Lakers matapos na magpasok ng 18 free throws ng walang mintis at umiskor ng 14 mula sa 36 na kabuuang score sa fourth quarter lamang para makaisa kontra Oklahoma City sa Game 3.
Dahil sa panalo ng Lakers naputol ang pamamayagpag ng Thunders at naitala na ang serye sa 1-2.
Naging dikitan ang laban at naging susi sa huling sandali ang ginawa ni Metta World Peace nang makuha ang bola mula kay Kevin Durant at maipasok ang dalawang free throws samantalang nasa 12.9 seconds na lamang ang nalalabi.
Nabigo rin si Durant na maipasok ang tangkang 3-pointer para sana maitabla ang laro.
Nasupalpal din ni Andrew Bynum ang tira ni Serge Ibaka na naging hudyat ng buzzer at tuluyang magbunyi ang Lakers’ crowd para sa kanilang ikalawang panalo pa lamang sa nakalipas na six playoff games.
Si Durant ay umiskor ng 31 points na muntik nang magbigay daan ang huling tira niya para sa Oklahoma City ng kanila sanang ikalawang tiyansa sa Western Conference finals.
Ito naman ang unang pagkakataon na nakatikim ng pagkatalo ang Thunder sa post season. Ang Game 4 ay gagawin bukas.
Samantala sina Russell Westbrook at James Harden ay nagpasok ng 21 puntos para sa Thunder, na nabigong pantayan ang magandang laro ng Lakers sa huling mga segundo.
Si Andrew Bynum ay tumulong naman ng 15 points at 11 rebounds para sa Lakers.
May tig-12 points naman sina Pau Gasol, Ramon Sessions at Steve Blake.
Si Gasol ay nagtala ng 11 rebounds at six assists.
Kung hindi nakabawi sa pag-collapse noong Game 2 ang Lakers ay baka napaaga sana ang kanilang bakasyon sa dahilang batay sa NBA history ay wala pang nakabangon na team mula sa 0-3 deficit.
Samantala, nasilat naman ng Philadelphia Sixers ang Boston Celtics sa Game 4 sa score na 92-83, para itabla ang serye sa 2-2 sa Eastern Conference semifinals.
Nakarekober ang 76ers mula sa 15 puntos na kalamangan ng karibal na team sa first half para gulantangin ang Boston mula sa limang sunod-sunod na puntos ni Andre Iguodala sa final 90 seconds.
Naging bayani ang dating nilait lait lamang na si Iguodala, nang ilagay ang koponan sa five point lead nang maipasok ang 3-pointer.
Sa darating na Martes ay may pagkakataong makabawi ang Boston sa pagbabalik ng laro sa kanilang teritoryo.
Hindi umubra ang beterano na sa championships na Celtics makaraang mag-collapse sa mas nakababatang mga tuhod ng players ng Sixers.
Si Iguodala ay nagpasok 16 points, si Evan Turner ay naka-16 na puntos habang si Lou Williams ay nagdagdag ng 15 para sa Sixers.
Sa panig ng Boston, si Paul ay Pierce ay merong 24 points, Rajon Rondo ay kumamada ng 15 points at 15 assists, habang inalat naman si Kevin Garnett na magbi-birthday bukas na sumablay ng siyam na beses mula sa 12 na mga tira.
Nagbunyi naman si Philadelphia CEO Adam Aron at agad nag-tweet sa breaktime. “This will have to be one of the best come backs ever for the (at) Sixers.”
Wala umanong mahihiling pa ang Pangulong Noynoy Aquino sa kasalukuyang bumubuo ng kanyang gabinete.
Pinakahuli sa naidagdag si bagong NEDA chief Arsenio Balisacan, kapalit ni Caytenao Paderanga na nagbitiw dahil sa problema umano sa kalusugan.
Sa panayam ng Bombo Radyo, maituturing nitong jackpot ang pagkakaroon ng ganitong mga katuwang sa pamamalakad sa gobyerno.
Ayon sa Pangulo, swerte umano siya at nahanap ang mga tamang tao na hindi lanag puro pa-cute kundi may produksyong ginagawa.
Umaasa na lamang ang Pangulo na hindi mapapagod at bibigay ang kanyang mga opisyal para samahan siya hanggang 2016.
“Swerte ako nahanap ko sila. Alam ninyo ‘yung… Hindi naman ho talaga biro na ‘nung umpisa talagang dighay ho eh ang lumalabas sa amin kada makita mo ang panibagong nadiskubre. Pero dito nga, ano, panatag ang kalooban ko na bawat isa sa bawat responsibilidad niya ay talagang tinututukan ‘yung dapat tutukan. Hindi ho naghihintay ng utos sa atin, proactive. Kumbaga, talagang literal na may kadamay ako doon sa lahat ng pinapasan ko as opposed to bahala ako lahat tapos lahat nagpapa-cute, ‘di ba? Dito ho talagang nagpo-produce,” ani Pangulong Aquino sa Bombo Radyo.
Nauunawaan umano ng Malacañang ang reklamo ng magkabilang panig ng mga employer at mga manggagawa kaugnay sa P30 wage increase sa Metro Manila.
Batay sa wage order ng regional tripartite wage board, magiging P456 na ang arawang sahod ng mga minimum wage earners.
Magugunitang umalma ang mga employers dahil masyado raw itong malaki habang minamaliit lang naman ito ng mga manggagawa.
Sinabi ngayon ni Deputy Presidential Spokesperson Abigail Valte, kailangang balansehin ang interes ng magkabilang panig para maiwasan ang mas malaking perwisyo.
Hindi daw maaring ibigay ang hirit ng mga manggagawa dahil ikalulugi naman ito ng mga employers at magreresulta sa tanggalan.
Tama lang umano ang desisyon ng wage board para magkaroon ng ‘win-win solution.�
“Ano po eh, meron naman din po kahapong mga employers group na nagrereklamo dahil masyado daw pong mataas. The government has to find the balance between the interests of our laborers, ayaw po natin silang mawalan ng trabaho, ayaw din po natin silang makakuha ng sweldo na hindi naman po nakakapantay doon sa kanilang tinatrabaho. So kailangan po—the wage boards that is usually their main concern na ano po ‘yung kayang increase na kayang i-absorb po ng employers na hindi po na-i-endanger ‘yung mga trabaho naman ng ating mga workers. Hopefully, while we understand that—kasi po ‘yung request pong iba is P125,” ani Valte.