Philippines Fresh News

LEGAZPI CITY – Dai na nakapalag pa an 11 mga kakalikahan sa dakop sa aktong nag-ooperate nin ilegal na sugal sa provincia nin Albay.

Binisto an mga naarestar na sinda Daryl Bulusan y Lorena , 24-anyos kan Candelaria Quezon; Jason Ferrer y Viray, 19-anyos, Bicutan, Metro Manila; Jake Dela Cruz y De Costa, 29-anyos, kanTiaong Quezon ; Ranilo Cruz y Abada, 24-anyos, kan Florida Pampanga; Oliver Pascual y Santiago, 21-anyos, Cabanatuan City asin Melchor Vitug y Aguilus, 44-anyos kan Sta Cruz, Lumbao Pampanga na anas mga revisador.

Mantang nadakop man an lima pa na binistong sinda Ramon Vigas y Apuli, 41-anyos barangay Dita, Legazpi City; Reynaldo orco y Nariot, 38-anyos kan Rawis Legazpi Cuty; Emerson Gumba y Añonuevo, 28-anyos kan Cabangan Legazpi City; Noel Capiz y Aben, 44-anyos kan San Roque, Legazpi City at Romeo Ramirez y Mila, 35-anyos kan Bonot, Legazpi City, anas mga cobrador.

Sa report na ipinaabot sa Bombo Radyo Legazpi, napag-araman na bandang alas 4:30 nin hapon, kan isirbi kan pinag-sarung pwersa kan 5RCIDG, Albay CIDIT asin Legazpi City PNP an search warrant kotra sa Meridien Samming Vista Corp. sa porsyon kan Our Lady’s Village, Bitano Legazpi City.

Narecover sa lugar an 208 pidaso nin betting sheets, 1 pirasong stamp pad, 9 bundles nin betting sheets, 3 monitor Samsung,1 CPU, 1 Unit keyboard, 1 pc white board asin kantidad na maabot sa P8,100.

Sa ngonyan, nasa kustodiya kan 5RCIDG office sa Camp Simeon A. Ola an mga nadakop para sa tamang disposisyon.

LEGAZPI CITY – Kritikal ngonyan an sarung lalaki makalihis na pagsasaksakon kan kainuman sa banwaan kan Bacacay, Albay.

Binisto an biktima na si Armando Alarcon y Bibal asin residente ng Barangay Tambongon, nasabing banwaan.

Sa imbestigasyon, nasa kaurugmahan an mag-aamigo sa mismong harung ni bgy. Kagawad Analiza dela Cruz bandang alas 3:00 nin hapon huli ta kapiyestahan.

Alagad huli ta anas na nakainom na an gabos, bigla na sana na nag-amok an suspek na si Javier Batalla asin pinagsasaksak an biktima.

Tulos man na nakadulag si Alarcon sa ibong kan dakol na tama mantang nakatakas man paparayo an suspek.

Sa ngonyan, nagtetenir pa sa ospital an biktima

Padagos man an imbestigasyon kan mga otoridad sa motibo asin posibleng kinamumugtakan kan suspek.

NAGA CITY- Pinili kan sarong lolo sa Quezon Province na tapuson an saiyang sadiring buhay sa paagi kan pagbitay. Binisto an biktimang si Loreto Llera, 52 anyos kan Barangay Bukal, banwaan kan Pagbilao.

Basado sa impormasyong ipigpadara kan Quezon Police Provincial Office (QPPO), nahiling na lang na nakabitay si Llera sa laog kan saindang residencia asin mayo nin buhay. Inaaram pa ngonian an posibleng rason kan biktima tangani na gibohon an insidente.

Posible suboot na grabeng problema an nagtulod digdi tangani na magpakagadan. Sa ngonian, pinaglalamayan na kan saiyang pamilya an nasabing lolo.

NAGA CITY – Pinaghahanap pa kan mga otoridad sa Quezon Province kun siisay an nasa likod kan panghahabon sa electrical wire sa poste kan Meralco sa bayan ng Lucban.

Batay sa impormasyong nakalap ng Bombo Radyo Naga, aabot sa mahigit 20 metrong electrical wire ang ninakaw ng mga hindi nakilalang suspek sa Barangay Igang. Nasa pag-ultanan ini kan mga posteng JY8-14 hasta JY8-15.

Pinagtutubudang ipapabakal kan mga suspetsado an nasabing wire sa mga junk shop.

Sa ngonian, pinaghahanap na kan PNP Lucban an mga suspetsado kasabay kan saindang pagirumdom sa mga junk shop na makipag-koordinar sa sainda kun igwa mang nagpabakal sa sainda nin electrical wires puon kasuodma.

NAGA CITY- Iniimbestigaran pa ngonian kan mga otoridad sa Camarines Norte kun siisay an nagwalat kan pirang illegal fishing paraphernalia asin banga sa kadagatang sakop kan Mercedes.

Basado sa impormasyon, nadukayan kan PNP Mercedes asin Bantay Dagat an mga inabandonar na iligal na kagamitan sa walong kilometro an rayo sa baybayon kan Magsatangi Pt, Barangay Colasi.

Kabilang na digdi an sarong fishing vessel na mayong pangaran asin may gira na ibaba an pirang fishing net tangani na magsira.

Apwera pa ini sa pirang kahoy, mga fish net asin pirang lubid.

Napag-araman na mantang paparani na an grupo, nanutaran man kan mga otoridad na pinutok kan mga tripulante an lubid kan bangka.

Nagdulag suboot pasiring sa Siruma, Camarines Sur an dae nabistong mga suspetsado. Tulos man nai-turn over kan PNP an mga ebidensya sa BFAR.

NAGA CITY – Liwat na nagbanat si Presidente Benigno Noynoy Aquino III sa nakalihis na administrasyon sa naging pagbisita kaini sa Naga City kasubago.

Sa inagurasyon kan bagong buloos na Naga City Hospital, pinasabitan kan presidente an proyektong GMA care fund ni dating Presidente Gloria Arroyo.

Dae suboot maagi sa anumang “cares” an kanser kan korapsyon sa nasyon tangani na maitaguyod an mga programa sa salud. Nakasalalay suboot ini sa mas pinakusog na serbisyong panlipunan asin pagpuksa sa kalakaran kan lumang sistema.

Liwat man kaining ipigbida an paglangkaw nin 78% sa budget sa Department of Health (DoH), paghiwas sa coverage kan PhilHealth asin an pagdakul kan mga benepisyaryo kan Pantawid Pamilyang pilipino Program o 4ps.

Kaiba man sa mga nag-atender sa aktibidad sinda DoH Sec. Enrique Ona asin Department of Interior and Local Government (DILG) Sec. Mar Roxas. An nasabing renovation kan ospital an parte kan ipigpangako kan presidente kan magbisita ini sa siyudad kan Marso na nagkakantedad nin P15 million.

Haros duwang oras lang na nagtener an presidente sa siyudad asin nagpasiring na sa mga banwaan nin Tinambac, Calabanga at Libmanan para sa pangangampanya. Nawalat man si Ona sa Naga City para sa groundbreaking ceremony kan sarong bagong building sa Bicol Medical Center (BMC).

Mahigot na seguridad man an ipiglatag kan Philippine National Police (PNP) sa probinsiya.

LEGAZPI CITY – Uminabot na nin sundo sa duwang ektarya kan parte kan Mayon Centennial Forest sa pamitisan kan bulkang Mayon sa Albay an prisente na ngonyan na nasusulo.

Sa intrivista kan Bombo Radyo Legazpi ki Pol. Sr. Insp. Arthur Gomez, tagapagtaram kan Albay Police Provincial Office, mismong an caretaker kan nasabing kagubatan sa porsyon kan barangay Lidong banwan kan Sto. Domingo an nagpaabot na nin kaaraman sa saindang lado magin sa DENR para sa tamang aksyon na pweding gibuhon katakod kan insidente.

Sa ngonyan, labi na sa 24 oras na nasusulo an nasabing porsyon kan nasabing lugar kun saen, dakol nang kahoy na itinanom pa kan mga kapulisan asin turista sa nakalihis na panahon an naabu.

Katakod kaini, padagos naman an imbestigasyon kan mga otoridad sa tunay na rason o pinaggikanan kan kasulo.

LEGAZPI CITY – Dai pa maditerminaran kan mga otoridad kun siisay an naglalay kan antigong type writer sa mismong opisina kan City engineering Office sa Legazpi.

Sa reklamo na ipinaabot kan sarung Aida Granadino, sinabi kaini na kasubagong aga sana man ninda narisa an pagkawara kan nasabing pinaka-iingatan sa opisina.

Sa imbestigasyon, nagluluwas na uminagi an mga mahabas sa bintana kan opisina.

Sa ibong kaini, dismayado man an mga opisyal kan City Hall huli sa nangyari kun saen, sa likuran sana man ini kan hepatura kan Legazpi City Community Police Assistance Center.

LEGAZPI CITY – Uminabot nin haros 423 porsiyento an nairehistrong paglangkaw sa kaso nin rape sa provincia nin Albay.

Sa ipinalyuwas na datus kan Albay Police Provincial Office (PPO), nagluluwas na gikan sa 15 kaso nin rape sa provincia sa enot na kwarto kan taon kan 2012, suminakat na ini sa 64 sa nakalihis sana man na tulong bulan ngonyan na taon.

Pinakadakol sa mga biktima an aki na uminabot sa bilang na 58 gikan sa 64 na kaso.

Nangengenot man sa mga lugar na may pinaka dakol na insidente nin panlulugos an mga ciudad kan Ligao, sinusundan kan ciudad nin Legazpi asin pantulo an banwaan nin Daraga.

LEGAZPI CITY – Dead on the spot an dating Cafgu member sa Masbate makalihis na paputukan kan mga nagrespondeng otoridad matapos na ini an magwala asin mag-amok sa Aroroy Masbate.

Enot kaini, dai na nagpapugol pa sa pagpapautok sa mismong harung kan kapitan kan barangay Barangay Tigbao an suspek na si Jayson Rovero y Obaya. 24-anyos asin residente kan bgy.Sindicate nasabing banwaan.

Kasunod kaini, tulos man na nagresponde an mga otoridad sa pangengenot kan Regional Special Operation Task Group (RSOTG) Masbate ngani na pakalmahon an nagwawala asin buyong na si Rovero.

Alagad, dai nagpaawat an suspek asin naggibo pang paputukan an mga otoridad.

Huli kaini, nagdesisyon na an tropa na patamaan si Rovero na nagresulta man sa tulos kaining pagkagadan.

Nakua man sa crime scene an walong live ammunition gikan sa calibre 45 badil kan suspek.

LEGAZPI CITY – Padifisilan ngonyan sa mga otoridad an pagditerminar sa suspek sa paggadan sa mag-ina sa Polangui, Albay.

Binisto an mga biktima na sinda Salvacion Caranza asin aki kaining si Christian Caranza, 15-anyos asin residente kan Barangay Gabon, nasabing banwaan.

Sa intrivista kan Bombo Radyo Legazpi ki Pol. Sr. Insp. John Retumban, hepe kan Polangui Municipal Police Station, sinabi kaini na nagkakarigos na sa sadiring dugo an mga bangkay kan biktima huli sa manlaen-laen na tama nin saksak sa lawas kan saindang madukayan sa mismong harung kaini kasubagong alas 8:30 nin aga.

Sa inisyal na imbestigasyon, napag-araman na linaug an harung kan mga biktima asin saka isinagibo an krimen.

Segun kay Retumban, sarung bota an anion harani sa pinangyarihan kan insidente.

Katakod kaini, makakatabang naman soboot an mga impormasyon na maitatao kan nasabing witness sa pagturo kan suspek sa nasabing krimen.

LEGAZPI CITY – Naiturn-over na sa Camalig Municipal Police Station an sarung vintage bomb na aksidenteng nakalot kan sarung paraoma sa porsyon kan banwaan nin Camalig, Albay.

Sa report na ipinaabot kan sarung Senica Llantero y Mortil, 57-anyos, amntang naglilinig sa sarung coconut plantation kan mahiling kaini an nasabing pampasabog na may sukol na 20cm.

Tulos man na nai-turn over sa mga otoridad an nasabing pampasabog para sa tamang disposisyon.

LEGAZPI CITY – Mayo nang buhay mantang nagpapataw-pataw sa tahaw kan salog na nadukayan an bangkay kan sarung negosyante sa Albay.

Binisto an biktima na si Angel Ebareta y Ramboyong, 22-anyos, negosyante asin residente kan Barangay Santikun, banwaan nin Polangui.

Sa intrivista kan Bombo Radyo Legazpi ki Pol. Sr. Insp. John Retumban, hepe kan Polangui Municipal Police Station, sinabi kaini na uminabot nin haros 24 na oras an ginbong search and retrieval operation sa lawas kan biktima na pigtutubudan na nalunod sa porsyon kan Agus River.

Segun sa opisyal, ultimong nahiling an biktima sa kataid kan nasabing salog kasuudmang aga alagad dai na ini nakabalik sa saiyang harong.

Mientras tanto, sarung pipi man an ultimong nakahiling sa biktima sa lugar kun saen ini nalunod kaya madifisilan man ngonyan sa Polangui Municipal Police Station an pagdeterinar sa tunay na nangyari sa biktima.

LEGAZPI CITY – Haros mapababa sa takot an mga pasahero kan sarung jeep makalihis na tutukan nin badil kan sarung police sa Camarines Norte.

An reklamo an ipinaabot ni Cherry Teh y Rafer, 32-anyos asin residente kan Purok-Narra, Poblacion-2, Basud nasabing provincia kaiba an driver kan pigsasakayan kaining jeep na si Carlos Dimas y Magana, anas residente kan nasabing lugar.

Sa imbestigasyon, mantang nagmamaneho an driver na si Dimas, bigla na sana ining inolang kan police na binisto sana sa pangaran na Pol. Insp. Vargas kan PIAS Camarines asin sabay na tinutukan nin badil sa dai maaraman na rason.

Dai pa nakontento asin maging an mga pasahero an tinakot man kaini.

Matapos an insidente, tulos man nagdulag an suspek.

Sa ngonyan, padagos pa an imbestigasyon kan Basud Municipal Police Station sa tunay na motibo kan insidente.

LEGAZPI CITY – Dagos ng nasangatan nin kaso an French National na nagwala asin nanlaban sa mga otoridad kan nakalihis na aldaw sa provincia kan Sorsogon.

Binisto an dayuhan na si Jermie Shouver, 24-anyos asin paramientras na nagdadagos sa Brgy. Awaii, bayan ng Donsol.

Marurumduman na huli sa labi-labing kabuyungan, nagwala asin nag-amok an nasabing dayuhan.

Maging an mga otoridad an naggibo kaining kulugon mantang pigpapakalma an sitwasyon.

Kasong direct assault an isinangat sa Provincial Prosecution Office, Sorsogon City na kakahampangon ngonyan ni Shouver.