Cebuano News
CAGAYAN DE ORO CITY-Ang Bombo Radyo pa gihapon ang paboritong gipaminaw sa mga tawo dinhi sa syudad subay sa pinakaulahing over-all radio survey nga gipagawas sa Random Access Consultants Incorporated (RACI).
Sa paghinabi sa Bombo Radyo Cagayan de Oro,gisaysay ni University of the Philippines (UP) Prof Lisa Baliao nga maoy presidente sa RACI nga sa walo ka estasyon sa radyo,ang sibyahan ang nag-una ug nakakuha sa 37.8 percent audience share.
Matud ni Baliao nga ikaduha lamang sa survey ang RMN-DxCC nga nakakuha sa 36.5 percent audience share.
Gilampaso usab ug maayo sa Bombo Radyo ang Magnum FM Radyo nga nakakuha lamang sa 15.8 percent audience share.
Ikaupat sa survey ang dxRU nga may nakuhang 5.7 percent audience share ug pulos anaa sa ikalima ang dzRH ug Aksyon Radyo nga may 1.5 percent audience share.
Anaa sa ikapito ug ikawalong puwesto usab ang dzMM at Killerbee nga pulos may tag 0.4 percent audience share.
Gibutyag ni Baliao nga ang gilusad nilang survey ang gihimo niadtong Abril 27 hangtod 30 gikan sa 40 barangays sa una ug ikaduhang distrito sa lungsod diin moabot sa 1,200 respondents nga gilakipan sa 600 ka babaye ug 600 lalaki.
Gitin-aw niini nga ang maong survey ang hilom nilang gilusad aron direktang ipaubos sa ebalwasyon ang tanang mga programa ning sibyahan.
Dugtong niini,kinasingkasing nagpasalamat ang mga opisyal ug empleyado sa Bombo Radyo sa mga tigpaminaw niini tungod sa walay pu-as nga pagsuporta sa tanang program ug proyekto niini.
Subling gipaniguro usab sa sibyahan nga kon unsa man ang gihatag nga pagsalig sa publiko,suklian kini sa kinasing-kasing nga serbisyo publiko ug pagpatuman sa program innovations,mga proyekto ug mga promo.
GENERAL SANTOS CITY – Gitay-og sa magnitude 3.1 nga linog ang Sarangani, Davao del Sur kaganihang alas 8:50 sa buntag.
Subay sa report gikan sa Philippine Institute of Volcanolgy and Seismology (Phivolcs) nga ang sentro sa linog ang mukabat sa 139 kilometers sa habagatang-sidlakang bahin sa maong lugar.
Nasuta nga ang gilawmon sa linog ang anaa sa tres kilometros og tectonic in origin.
Samtang kaganihang alas 2:40 sa kaadlawon natigayon ang 2.4 magnitude nga linog sa Jose Abad Santos, Davao del Sur.
Ang sentro sa maong linog ang anaa sa 112 kilometers sa habagatang-sidlakang bahin sa maong lugar.
Nasayran nga ang gilawmon sa nasampit nga linog ang mukabat sa 48 kilometros og tectonic in origin.
Sa maong duha ka linog walay natala nga samaron og damyos.
DAVAO CITY – Tinguha karon sa tropa sa kagamhanan nga ma-contact ang mga gikasangka nga mga rebeldeng New People’s Army aron nga katambalan sa hospital sa kagamhanan.
Kini human maklta ang daghanan nga mga dugo sa gitagu-an sa mga rebelde nga nagtimailhan nga dunay mga samdon sa bahin sa mga rebelde.
Kahinumduman nga milunsad ang 67th Infantry Battalion Philippine Army ug Security Patrol human makadawat ug impormasyon gikan sa rebel returnee Freddie Cayetano alyas Greg ug alyas Cruz nga unang misurrender dala ang usa ka AK47 ug M16 Armalite rifle gikan sa iyang duha ka mga kaubanan nga mi-snipe ug mihasi sa Mahan-ub Patrol Base sa Barangay Mahan-ub, Baganga, Davao Oriental.
Ang nahisgutan nga tropa nakigsangka sa upat ka mga rebeldeng NPA sa Sitio Banahao, Barangay Mahan-ub, Baganga, Davao Oriental mga 12:40 sa hapon Mayo 3, 2013.
Milungtad ang panagsangka ug hangtud sa napulo ka minuto. Wala’y gikatala nga patay o kaha samdon sa bahin sa kagamhanan, apan sa gitagu-an sa mga rebeldeng NPA nakita ang mga tinulo sa dugo nga nagtimailhan nga dunay nanga-igo sa mga NPA.
Na-recover sa tropa sa kagamhanan ang usa ka M653 Baby Armalite rifle ug usa ka handheld radio.
CAGAYAN DE ORO CITY – Patay usab ang usa ka batan-ong lalaki human mabangga ang iyang gimanehong motorsiklo diha sa Zone 4, Batingtingan, Manolo Fortich, Bukidnon kagabii.
Naila ang namatay nga si Jerson Tapang, 19-anyos, ulitawo nga residente sa maong lugar.
Naghatud pa ang biktima sa iyang amigo diha sa Ala-e sa dihang mibangga ang motorsiklo niini sa laing motorsiklo atol sa iyang pagpa-uli.
Nakaangkon ug grabeng “head injury” ang biktima, kinsa gideklarar sa mga doktor nga dead on arrival sa Northern Mindanao Medical Center.
Naangol usab ang driver sa motorsiklo nga nakabangga sa biktima ug gitambalan karon sa Ala-e hospital.
CAGAYAN DE ORO CITY – Walay swerteng nakabsan sa iyang kinabuhi ang usa ka lalaki nga gidunggab diha sa Barra, Macabalan ning syudad.
Naila ang biktima nga si Marwin Macabale, 28-anyos, minyo nga residente sa maong dapit.
Usa ka suspek nga naila lamang sa pangalang Alyas Bulakoy ang midunggab sa biktima gamit ang plamengko sa dihang migawas kini sa usa ka internet cafe.
Nakaangkon ug dakong samad sa iyang ilok ang biktima nga nagresulta sa kamatayon niini sa Northern Mindanao Medical Center.
Gisuta pa karon sa kapolisan kon unsay motibo sa pagdunggab-patay sa maong biktima.
CAGAYAN DE ORO CITY – Nabiktima sa pagpangawat ang usa ka American national human giingong nakighilawas sa ka facebook friend niini sa dakbayan sa Cagayan de Oro.
Giila ang biktima nga si Sunton Evans, 40-anyos nga residente sa San Diego City, California, Estadus Unidos.
Subay sa sugilon sa biktima nga nagkauyon matud pa sila sa facebook friend niini nga si Jayson Rulleta nga mag-check-in sa motel ning dakbayan.
Human matud sa ilang kumbate,giangkon niini nga nakatulog siya hinungdang gikawat ang iyang 2-mil Hongkong dollars ug silsilyo na lamang ang nabilin sa iyang pitaka.
Igo na lamang sa pagpa-blotter ang nahimo sa Kano sa kapolisan batok sa misibat nga suspek.
CAGAYAN DE ORO CITY – Inotil gihapon ang kapolisan sa pagsanta sa mga kaso sa pagpanulis dinhi sa syudad.
Maoy labing ulahing nabiktima sa pagpanulis kagahapon ang usa ka Indian national nga tigpatanto ug salapi nga nailang si Gorwendel Singh.
Nagbaklay matud pa sa dalan diha sa Brgy. Cugman ning syudad ang maong langyaw sa dihang gitulis kini sa 3 ka suspek nga armado sa 45 kalibreng armas.
Nakuha gikan sa maong langyaw ang iyang pitaka nga may sulod nga 1, 500 nga salapi, immigration ID ug ATM cards.
Human sa maong pagpanulis, gilayong misibat ang mga suspek sakay sa motorsiklo nga walay plaka.
BUTUAN CITY – Gikumpirma ni Agusan del Sur Vice Governor Santiago Cane nga nakapili na ang ilang partido pagpanguna ni National Unity Party chairman Governor Eddie Bong Plaza, og ihulip sa mitaliwang mayoralty candidate nga si kanhi Mayor Deo Manpatilan sa lungsod sa Esperanza, Agusan del Sur.
Nahukman sa ilang partido nga ang kamagulangan nga anak sa kanhi mayor nga si Deo Manpatilan Jr., 27-anyos ang i-substitute kaniya og sa daling panahon iindorso na siya ngadto sa Commission on Elections kon COMELEC.
Gibutyag sa opisyal nga nagtubo si Deo Jr. kauban ang iyang mga ginikanang milingkod sa taas nga pwesto sa ilang lugar kondiin ang inahan niini og asawa sa namatay ang kasamtangang mayor sa lungsod nga si Nida Manpatilan, rason nga ilang makonsiderang taas na ang background niini sa pag-obserbar unsaon pagdala sa renda sa panggamhanan.
Gibutyag ni Vice Governor Cane nga liver cancer ang gihambin nga sakit ni kanhi Mayor Deo Manpatilan kinsa ihatud sa iyang katapusang pahulayanan karong Mayo 8, adlaw’ng Miyerkules.
CAGAYAN DE ORO CITY-Moabot na sa 10 lugar sa Amihang Mindanao ang gipaubos sa area of immediate concern sa Commission on Elections kon Comelec.
Kini nunot sa nagkaduol nga automated elections sa Mayo 13 ning tuiga sa bansa.
Sa paghinabi sa Bombo Radyo Cagayan de Oro,gibutyag ni Misamis Oriental election supervisor Atty Cirilo Nala nga gawas sa Gingoog City anaa na usab sa area of immediate concern na ang mga lungsod sa Magsaysay,Medina,Talisayan,Balingasag,Kinoguitan,Salay, Balingoan at Lagonglong nga pulos nakabase sa esteng bahin sa lalawigan.
Matud ni Nala nga ang maong lakang ang epekto sa presensiya sa mga rebeldeng New People’s Army (NPA) sa maong mga lugar.
Dugtong niini,mas gidugangan pa ang presensiya sa militar ug pulis sa maong lugar aron maabog ang mga rebelde.
Una nang nabulit sa pila ka batalyon sa Philippine Marines ang Gingoog City dahil sa pagbanhig sa mga rebelde sa convoy ni Gingoog City Mayor Ruthie de Lara Guingona nga gikaangol niini ug gikamatay sa duha niya ka personal drivers nga si Bartolome Velasco ug Nestor Velasco.
Gawas sa Misamis Oriental,gipaubos na usab sa area of immediate concern ang lungsod sa Nunungan sa Lanao del Norte tungod sa pagbanhig sa convoy ni Mayor Abdulmalik Manarampan nga gikamatay sa 14 ka tawo.
Hisayrang una nang gipaubos sa election hot spot ang lalawigan sa Misamis Occidental tungod sa political rival history sa pipila ka mga kandidato sa lugar.
CAGAYAN DE ORO CITY- Gipangita karon sa kapolisan ang mga suspek sa pagpusil sa duha ka tawo diha sa Sta. Cruz, Aluba, Macasandig ning syudad kaganinang sayo sa kadlawon.
Naila ang mga biktima nga sila si Lyndon Alaya-ay ug Joe Pardillo, pulos 35-anyos ug residente sa maong dapit.
Matud ni SPO1 Aristotol Caseres sa Macasandig Police Station nga subay sa ilang inisyal nga imbestigasyon, natigayon ang pagpamusil human nakalalis sa mga biktima ang duha ka suspek nga pulos maranao-muslim tungod lamang sa dulang basketball.
Si Alaya-ay naigo sa toong bahin sa iyang kamot samtang si Pardillo nakaangkon usab ug samad sa iyang likod, apan luwas na sa kuyaw nga kahimtang ug nakagawas na sa Northern Mindanao Medical Center.
Lakip sa gipangita karon sa kapolisan ang suspek nga nailang si Allan Ganja, 40 anyos, minyo nga residente gihapon sa nasampit nga lugar.
CAGAYAN DE ORO CITY – Gikustudiya karon sa kapolisan ang driver sa Trailer truck nga nakabangga-patay sa usa ka motorista diha sa national highway sa Brgy. Cugman ning syudad kaganinang sayo sa buntag.
Naila ang namatay nga si Reymar Cabunoc Y Llorin, 28 anyos nga taga Osmena Extension, Brgy. 26 ning syudad samtang ang suspetsadong Trailer truck driver mao si Roque Oling Arellano.
Matud ni PO2 Noel Perpetua sa Cugman Police Station nga kusog ang dagan sa motorsiklo sa biktima sa dihang mibangga kini sa trailer truck nga gimaneho ni Arellano nga nagresulta kini sa iyang hinanaling kamatayon.
Kasong reckless imprudence resulting to homicide ang kasong ipasaka sa kapolisan batok sa maong trailer truck driver.
DAVAO CITY – Mayoral candidate sa Banganga, Davao Oriental nakalapas sa permit to campaign (PTC) policy sa rebeldeng NPA mao nga gidakop human mangampanya.
Sa kasamtangan padayon ang negosasyon aron nga kabuhi-an si Ronie Usman nga kandidato sa pagkamayor sa lungsod sa Bagangga Davao Oriental.
Gidagit si Usman sa mga rebelde sa Barangay Sampawan, Bagangga mga ala 1:00 sa hapon.
Nasayran nga gikan nga nangampanya si Usman apan gibabagan ug gidala kini sa kaila nga usa sab sa mga midagit kaniya.
Sumala pa kang P/Sr Superintendent Jose Carumba, police provincial director sa Davao Oriental, wala gayud magdahum si Usman nga mabiktima siya sa pagpangdagit sa mga rebeldeng NPA.
Wala pa matakda kung kanus-a buhi-an ang biktima.
DAVAO CITY – Mayoral candidate sa Banganga, Davao Oriental nakalapas sa permit to campaign (PTC) policy sa rebeldeng NPA mao nga gidakop human mangampanya.
Sa kasamtangan padayon ang negosasyon aron nga kabuhi-an si Ronie Usman nga kandidato sa pagkamayor sa lungsod sa Bagangga Davao Oriental.
Gidagit si Usman sa mga rebelde sa Barangay Sampawan, Bagangga mga ala 1:00 sa hapon.
Nasayran nga gikan nga nangampanya si Usman apan gibabagan ug gidala kini sa kaila nga usa sab sa mga midagit kaniya.
Sumala pa kang P/Sr Superintendent Jose Carumba, police provincial director sa Davao Oriental, wala gayud magdahum si Usman nga mabiktima siya sa pagpangdagit sa mga rebeldeng NPA.
Wala pa matakda kung kanus-a buhi-an ang biktima.
GENERAL SANTOS CITY-Gikompirma ni Kris Aquino sa iyang pagbisita karong adlawa sa GenSan nga kasamtangan gipahigayon ang business deal alang sa pag-invest niini sa beach resort sa Gumasa sa Glan, Sarangani Province.
Kahinumduman nga sa miaging mga bulan nagbisita sa unang higayon ang presidential sister sa GenSan og Sarangani aron magshooting alang sa iyang birthday celebration sa TV program program niini.
Nakadayeg si Kris sa kaanindot sa Gumasa hinungdan nga gusto niini nga mupalit og beach resort.
Mipasalig usab kini nga mutabang sa pagpromote sa turismo sa Mindanao.
Ang Gumasa ang usa white beach sa Sarangani, usa ka oras ang biyahe gikan sa GenSan.
GENERAL SANTOS CITY-Patay ang usa ka babaye nga manager sa bangko sa Polomolok, South Cotabato human gipusil sa wala pa mailhing mga suspek.
Sa pakighinabi sa Bombo Radyo GenSan kang P02 Renato Paclibar Jr. sa Polomolok PNP, iyang gibutyag nga ang biktima ang nailhan sa pangalan nga si Carolyn Bandala, manager sa Rural Bank of Alabel, Polomolok Branch, nga taga Purok Masagana, Magsaysay, Polomolok, South Cotabato.
Sa inisyal nga imbestigasyon sa kapulisan nga ang biktima ang angkas sa motorsiklo nga gimanehuan sa iyang bana padulong sa trabaho kaganihang buntag.
Samtang anaa sa area sa usa ka pribadong sementeryo kalit nga nagpabuto ang tulo ka mga tawo nga gaatang og namatikdan sa bana nga nahulog ang iyang asawa sa motorsiklo 30 metros ang gilayon gikan sa crime scene.
Ang mga suspek ang misakay gilayon sa motorsiklo nga ga-standby sa daplin sa national highway og miikyas sa padulong sa GenSan ang direksyon.
Walo ka empty shell og usa ka slug sa .45 nga pistola ang nakit-an sa crime scene.
Ang biktima ang namatay samtang gitambalan sa ospital og sa likod nga bahin ang kasagarang igo sa maong babaye.
Samtang work related ang anggulo nga gitutukan sa kapulisan sa imbestigasyon sa kaso gumikan adunay mga gikasuhan nga mga kliyente ang biktima nga wala nakabayad sa utang.
