Philippines Fresh News

BACOLOD CITY – Lima ka suldado ang patay samtang duha ang pilason sa nagluntad nga engkwentro sa tunga sang rebeldeng New People�s Army kag tropa sang 47th Infantry Battalion sa ciudad sang Sipalay, Negros Occidental kaina sang aga.

Ini ang ginkumpirmar ni Lt. Col. Rey Bañares, ang deputy commander sang 303rd Infantry Brigade.

Nagluntad ang engkwentro mga alas 8:00 kaina sang aga sa tunga sang ginpatigayon nga pursuit operation sang 47th IB kasunod sang pagsunog sang kapin 30 ka armado nga mga kalalakinhan sa bunkhouse sang Philex Mining Corporation sa Barangay Kamindangan kagab-i.

Ang mga armado ginapatihan mga katapo sang Southwest Front sang New People�s Army.

Wala pa ginpalayag sang militar ang ngalan sang nagkalamatay nga suldado samtang ang mga pilason ang yara sa karon sa hospital sa ciudad sang Kabankalan.

ROXAS CITY � Patay ang 49-anyos nga babae samtang pilason nga gindala sa ospital ang iloy sini sang maigo sang kilat sa Barangay Sto. Niño, Dumalag, Capiz.

Sunog ang lawas ni Emma Apocero sang Sitio Palle, Barangay Sto. Niño banwa sang Dumalag samtang ginabulong karon sa Senator Gerardo Roxas Memorial District hospital ang iloy nga si Emelita Ucag nga nag-angkon sang 2nd degree burn sa walas matapos maigo sang kilat.

Nagapanguha sang monggo ang mag-iloy sa tunga sang ulumhan sang hinali nga mag-ulan kag magdalugdog kasunod ang pagpangilat.

Nakibot na lamang ang kaupdanan sang mga biktima sang hinali nga matumba ang duha.

Gilayon nga gindala sa ospital ang mag-iloy apang gindeklarar nga dead on arrival si Emma samtang confine karon sa nasambit nga balay bululngan si Emelita.

ILOILO CITY – Ginahibalo pa subong sang mga pulis sa banwa sang New Lucena, Iloilo kun sin-o ang iloy sang nasapwan nga fetus sa kilid sang dalan sa Brgy. Pasil.

Sa interview sang Bombo Radyo Iloilo kay PO2 Rodel Umahag sang New Lucena Municipal Police Station, ang fetus ang nasulod sa katsa nga bag kag ginabanta malapit na siyam ka bulan.

Sunu sa pulis, mahimu nga sang nagligad pa nga gab-i ginbilin ang fetus bangud ginasubayan na ini.

Ginpahayag nga ginbutangan pa sang ice ang fetus samtang yara sa sulod sang bag.

KORONADAL CITY – Gin-ako ni South Cotabato Commission on Election okun Comelec Supervisor Doque Kadatuan nga may pormal nga reklamo may kaangtanan sa opisyal nga mga balota sa banwa sang Polomolok.

Ginpahayag ni Kadatuan sa Bombo Radyo Koronadal nga nakasaad sa reklamo nga kun mahimo pagausisaon ang balota sa nasambit nga banwa.

May kaangtanan sini, ginahangkat sang opisyal ang mga nagapangduha-duha nga maglagda sang ginpanumpaan nga salaysay agud nga may mangin balasehan sa tagsa ka mga alegasyon.

Ang nasambit nga pahayag ang ginpaguwa ni Kadatuan pagkatapos sang ginaalegar nga tapos na ang eleksyon sa nasambit nga banwa.

KORONADAL CITY – Ginpangenwala ni South Cotabato OIC Jail Warden Felicito Gumapac nga wala sang gwardya ang isa sang mga preso nga gindala sa balay bululngan sa syudad sang Koronadal.

Sa interbyu sang Bombo Radyo Koronadal, ginpahayag ni Gumapac nga ginamonitor sang iya nga gwardya ang preso nga ginkilala kay Antonio Alfere nga nagasufrer sang nagkalain-lain nga balatian.

Kaangot sini, gin-ako ni Gumapac nga indi garantiya kun may balatian indi na magpalagyo ang preso.

Suno pa nga ang gwardya sa nasambit nga preso ang ginkilala kay Jong-jong dela Cruz.

Una dir, naobserbaran sang Bombo Radyo Patrol sa pagbisita sa South Cotabato Provincial Hospital nga wala sang nagabantay sa nasambit nga preso.

ILOILO CITY– Ospital ang gintup-an sang isa ka 52 anyos nga lalaki matapos mag check-in sa motel upod ang isa ka babaye.

Ang biktima ginkilala nga si John Viseno sang Mandurriao, Iloilo City.

Ang biktima gindala sa Iloilo St. Paul’s Hospital matapos ginpahayag gin-atake sa kasing-kasing samtang yara sa Katrina Lodge sa Lapaz, Iloilo City.

Kaupod sang biktima nga gindala sa ospital ang isa ka babaye apang ginbayaan man ini rason nga nagpanawagan na lang ang ospital sa pamilya sang biktima paagi sa Bombo Radyo.

ILOILO CITY– Labi nga nadugangan ang pagkasubo sang pamilya sang Ilonggo OFW nga napatay sa Saudi Arabia nga ginkilala kay Apolinario Bisnar sang Brgy. Lubacan, Guimbal, Iloilo matapos sala nga bangkay sang ila himata ang nag-abot sa ila.

Ini matapos magsala ang agency nga nagtransport sang bangkay kag sa baylo nga bangkay ni Bisnar, ang bangkay sang isa pa ka Filipino nga napatay nga ginkilala kay Jerry Almario sang Bataan ang nag-abot sa lugar sang biktima.

Ginpasiguro naman sang Overseas Workers Welfare Administration (OWWA) ang pagproseso sa pagbaylo sang nagbayluhanay nga bangkay.

ROXAS CITY — Padayon nga ginabulong sa isa ka ospital ang 22-anyos nga dalaga nga nagisi-an sang kinatawo matapos ginapahayag nga nakig-hilawas sa nobyo.

Ginpadangat sa ospital sang iya iloy ang dalaga nga nakilala lamang sa pangalan nga Joy, matapos nagsuprer sang wala-untat nga pagdugo.

Suno sa iloy nga si Thelma, natalupangdan sini ang pagpangluya sang anak nga tungang-gab-i na nagpauli matapos naglisensiya nga makigkita sa mga kaabyanan.

Ginpabutyag pa sang ginang nga nagpangayo na lamang sang bulig ang anak nga dal-on sa ospital bangud sa ginsuprer nga pagdugo kag gin-ako nga may natabu sa ila sang nobyo.

Ginpaidalom naman sa operasyon ang dalaga bangud ginapahayag nga nagisi ang kinatawo sini suno man sa doktor nga nagtsekyar sa iya.

Koronadal City — Gindayaw ni South Cotabato Commission on Election (Comelec) Supervisor Atty. Doque Kadatuan ang ginapatigayon nga Debate sa Bombo sang mga kandidatu sa probinsya.

Ginpahayag ni Kadatuan nga maayo ang ginapatigayon nga debate bangud ginahatagan sang patas nga oras ang mga kandidatu agud nga mapalayag ang mga plataporma de gobyerno kag ang katuyuan sa pagpapili sa posisyon.

Gindugang pa sang opisyal, makabulig ang nasambit nga tikang agud nga mahibaluan sang mga botante ang mga kandidatu nga nagakaangay sa posisyon.

May kaangtanan sini, ginpain naman karon sa gab-I ang debate sa duha ka mga kandidatu sang probinsya nga magapapili sa pagkakongresista sang segundo distrito.

ILOILO CITY – Ginpasakaan sang kaso nga vote buying ni Iloilo 2nd District Rep. Agusto “Buboy” Syjuco sanday Sen. Franklin Drilon, Iloilo Gov. Arthur Defensor Sr. kag iban pa nga kandidato sang Liberal Party (LP) sa 2nd district sang Iloilo.

Tatlo ka separado nga complaint nga paglapas sa Article 22, Sec. 261 sang Omnibus Election Code of the Philippines ang gin-file sang legal counsel ni Syjuco nga si Atty. Jerome Padios sa talatapan ni Atty. Jessie Suarez, acting provincial election supervisor sang Comelec-Iloilo.

Ginhimu nga basehan sa pagpasaka sang kaso ang gin-alager mga ginpangako nga proyekto sang mga nasambitan kabaylo sang suporta sang mga botante sa ila kandidatura.

Gintumod man ang pagpanagtag sang tag P500 nga educational assistance ni Defensor sa mga high school graduates nga sunu diri ginhungod ang timing sa eleksyon.

BACOLOD CITY — Ginmando na ni Police Regional Office-6 Director Chief Supt. Agrimero Cruz ang pagpahalin sa puwesto sa hepe sang Pulupandan Police Station sa Negros Occidental nga si Senior Insp. Anthony Grande.

Ini ang kasunod sang ginpatigayon nga raid sa balay ni Pulupandan Mayor Magdaleno Peña kon sa diin naglab-ot sa 89 nga nagakalain nga sahi sang armas kag mga bala lakip na ang military TNT explosive ang nakuha.

Suno kay Chief Supt. Cruz, hibaluon sini kon ngaa nakaangkon sang kasubong nga sahi sang mga armas si Mayor Peña kag ang pagkamalapit ni S/Insp. Grande sa alkalde.

Una diri duha man ka police ang ginpaidalom sa restriction matapos naabtan sang raiding team nga yara sa sulod sang compound sang pamilya Peña.

ILOILO CITY- Naka-pyansa na si Iloilo City mayoralty candidate Rommel Ynion nga gin-aresto sa tunga sang political rally sa Brgy, Bito-on Jaro kagab-e.

Las-2:00 kaina sang hapon sang nagbayad sang pyansa si Ynion matapos nga gin-aprubahan ni Judge Danilo Galvez sang Regional Trial Court Branch 24 ang hingyo sini.

Naglab-ot sa P60, 000 ang pyansa nga ginbayad sang kandidato para sa tatlo ka counts sang tax evasion case.

Si Ynion ang nagapabilin subong sa Iloilo St. Paul’s Hospital kun sa diin ini ang gindala bangud sa ginapahayag pagtaas sang presyon matapos nga gin-aresto.

Nahibaluan nga nangin tensyonado ang pag-aresto kay Ynion matapos nga ginpunggan sang iya supporters ang grupo ni S/Supt. Benjamin Ilansano, hepe sang Intelligence Division sang Philippine National Police, sang ginserbehan ini sang warrant of arrest.

KORONADAL CITY – Patay ang 46 anyos nga babaye nga bank manager sang Rural Bank of Alabel sa banwa sang Polomolok, South Cotabato matapos nga ginluthang sa wala pa makilal-an nga gunman.

Sa interbyu sang Bombo Radyo Koronadal kay PO2 Renato Paclibar, duty investigator sang Polomolok PNP, nga ang biktima ang ginkilala kay Caroline Bandala Bantilo nga ginluthang sa national highway sang nasambit nga banwa.

Suno kay Paclibar, nakasakay sa motorsiklo ang biktima kaupod ang iya bana sang ginpalapitan sang wala makilal-an nga suspek kag ginluthang sang makapito ka beses nga gintunaan sang iya nga gilayon nga kamatayon.

Ginaistudyuhan pa sa karon sang Polomolok PNP ang anggulo nga may kaangtanan sa iya nga trabaho bilang bank manager sang isa ka banko ang motibo sa pagpatay sa biktima.

BACOLOD CITY — Ginapanindugan ni Mayor Magdaleno Peña sang Pulupandan, Negros Occidental nga lisensiyado ang pag-angkon sini sang mga armas.

Ini ang mensahe sang alkalde kasunod sang ginpatigayon nga raid sa iya balay kon sa diin madamo nga armas nga nagkalain-lain nga kalibre ang nakuha kag military TNT explosives.

Nahibaluan nga nag-out of town ang alkalde sang ginpatigayon ang raid.

Samtang, anoman nga oras igapasaka sang mga otoridad ang kaso batok sa alkalde nga paglapas sa R.A 8294 o illegal possession of firearms and ammunitions.

Naglab-ot sa 89 tanan ka mga armas ang narecover sa puluy-an sang alkalde nga ginalakipan sang 1 HK rifle, 7 AK-47, 2 M16 rifle nga ginapanag-iyahan sang gobierno, 52 shotgun, 1 galil, 2 manchester rifle, 8 sniper rifle, mga bala, bandoleers kag ¼ pounds Military TNT explosives, mga bala, bandoleers kag ¼ pounds Military TNT explosives nga mahimo makaguba sang gamay nga building.

Nagapati naman ini nga politika ang sa likod sang amo nga lihok bangod kilala ini nga taga-suporta sang nagakandidato sa pagka gobernador sa probinsya nga sang damlag pa nabutang sa kontrobersiya ang ngalan bangod sang pagpanghangkat sang debate kag boxing sa kontra sang iya kandidato.

BACOLOD CITY – Naglab-ot sa masobra 50 ka nagkalain-lain nga sahi sang armas ang na-recover sang mga otoridad sa ginpatigayon nga raid sa balay ni Mayor Magdaleno “Magsy” Peña sang Pulupandan, Negros Occidental.

Ini ang ginalakipan sang mga AK-47, M16 armalite rifle, shot gun, 45 caliber pistol.

Nahibaluan nagikan kay Negros Occidental Police Provincial Office OIC Dir. Senior Supt. Ricardo Dela Paz nga ginpatigayon ang raid base sa search warrant nga gin-issue ni Judge Felomina Singh, sang Quezon City Regional Trial Court kasunod sang mga impormasyon nga may mga unlicensed firearms ang alkalde.

Ang Criminal Investigation and Detection Group (CIDG) Manila mismo ang nagpatigayon sang raid sa bulig sang Special Action Force (SAF).

Ginklaro ni Dela Paz nga hibaluon pa nila gikan sa mga nakuha nga armas ang wala sang lisensiya.

Wala naman sa iya balay ang alkalde sang ginpatigayon ang raid.

Si Mayor Peña ang anay live-in partner ng TV host/actress nga si Plinky Recto.