Philippines Fresh News


Local News

Nakikiusap ang Malacañang sa mga Moro Islamic Liberation Front (MILF) ground commanders na kumalma lamang sa kabila ng pagkakaantala sa tatlong natitirang annexes ng Bangsamoro Framework Agreement.

Una ng sinabi ni MILF vice chairman Gadzali Jafaar na dismayado ang mga ground commanders at nawawalan na sila ng tiwala sa peace process.

Sinabi ni Deputy Presidential Spokesperson Abigail Valte, nauunawaan nila ang sentimiyento ng mga MILF commanders pero makakaasa silang committed ang gobyerno sa peace process.

Ayon kay Valte, gusto lamang ni Pangulong Aquino na katanggap-tanggap sa lahat ang bubuuing final peace agreement kaya maingat na binubusisi ang mga annexes.

Naniniwala naman ang Malacañang na malapit ng matapos ang negosasyon bagama’t hindi pa masabi kung kailan magpipirmahan.

Read More

Inirekomenda na ng Department of Justice (DoJ) ang pagsasampa ng kasong murder laban sa isa sa mga suspek sa pagpatay kay Batangas Assistant Provincial Prosecutor Alexander Sandoval.

Ayon kay DoJ Prosecutor General Claro Arellano, ang kasong murder laban kay Jayson Espejo Guerrero at sa dalawang John Does o mga hindi pa nakikilang suspek ay nakatakdang ihain sa korte sa Lemery, Batangas.

Samantala, ang itinuturo namang isa sa mastermind sa krimen na si dating Sta. Teresita Mayor Anna Marie Mendoza ay sasalang sa preliminary investigation para sa kasong murder at illegal possession of firearms.

Kaugnay nito, mananatili pa ring nakakulong si Mendoza matapos lumagda sa waiver na patunay na pumapayag itong maisailalim sa preliminary investigation sa kustodiya ng pulisya.

Itinakda ang preliminary investigation hinggil sa reklamo sa Hunyo 21 ganap na alas-10:00 ng umaga sa headquarters ng DoJ.

Maliban kay Mendoza, kasama ring isasalang sa preliminary investigation para sa reklamong murder ang asawa nitong si Hermogenes alyas Genes, kasama na rin ang isang Richard Briones at alyas Toks.

Read More

BUTUAN CITY – Tatlong mga sibilyan ang patay sa umano’y nangyaring harassment ng mga miyembro ng New People’s Army (NPA) sa may Purok 4, Sitio Kamarangan, Barangay Kawili-an, bayan ng Esperanza, Agusan del Sur kaninang alas-10:00 ng umaga.

Maliban dito ay sinilaban pa ang ilang heavy equipment ng Sianalyn Pantation Company sa nasabing lugar.

Ayon kay S/Insp. Melvin Rufon, hepe ng pulisya sa naturang bayan, ito ang natanggap niyang inisyal na report ngunit hindi pa niya maibigay ang pangalan ng mga biktima hangga’t hindi pa nila napapasok ang lugar na nasa clearing operations.

Sa eksklusibong interview ng Bombo Radyo Butuan, inihayag ng opisyal na ang mga biktima ay naninirahan sa lupaing pagmamay-ari ni yumaong Mayor Deo Manpatilan.

Nakikipag-ugnayan na sila sa mga kasundaluhan upang mailunsad agad ang pursuit operation laban sa responsableng grupo.

Patuloy ding mino-monitor ng kanilang puwersa ang sitwasyon na siyang pinakauna umanong naganap sa kanilang bayan sa ilalim ng kanyang liderato.

Read More

ROXAS CITY � Patuloy na inoobserbahan sa pagamutan ang isang bagong silang na sanggol na iniluwal na walang kamay, dila at butas sa puwitan.
Kasalukuyang nasa intensive care unit (ICU) ng Roxas Memorial Provincial Hospital ang lalaking sanggol na iniluwal ni Mrs. Leah Daños, 20, ng Salocon, Panit-an, Capiz.
Ayon kay Daños labis ang kanyang pagkagulat nang makita na walang kamay, dila at butas sa puwit ang anak na normal naman nitong ipinanganak sa rural health center ng nasabing bayan.
Aminado rin ang ginang na hindi siya nakapagpa-ultrasound habang nagbubuntis dahil sa kakapusan ng pera.
Ang nasabing sanggol ay pangatlo na sa tatlong mga anak ng ginang.
Read More

ZAMBOANGA CITY – Naaresto ng magkasanib na puwersa ng PNP at militar ang itinuturing na kumander ng rebeldeng grupo at nasa Top 16 most wanted persons sa Region 9 sa isang lugar sa Barangay Dalama sa munisipyo ng Payao, Zamboanga Sibugay.
Bandang alas-4:30 ng madaling araw kanina nang pasukin ng mga otoridad ang bahay na pinagtataguan ng suspek na kinilalang si Talib Asaali na nagdadala rin ng mga alyas Commander Talib at Commander Saguksuk.
Batay sa warrant of arrest na inilabas ng korte laban sa nahuling suspek, nahaharap ito sa mga kasong multiple murder, frustrated murder at mga kasong theft.
Nakuha ng mga otoridad kay Asaali ang isang unit ng baby armalite rifle, isang caliber .45 pistol at mga magazine ng iba�t ibang mga baril na may mga bala.
Nabatid din na may inirekomendang monetary reward ang otoridad para sa pagkakahuli sa suspek.
Kasalukuyang nasa kustodiya na ng Zamboanga Sibugay Provincial police office ang naarestong bandido. (MRDS)
Read More

DAVAO CITY � Tinitingnan ngayon ng mga imbestigador na mechanical problem o problema sa makina ang naging dahilan ng pagbagsak ng spray plane sa isang banana plantation sa Asuncion, Davao del Norte.
Nasa hospital pa rin ang piloto ng light plane na si Capt. Michael matapos bumagsak sa Soriano Fruits Agrarian Reform Benefeciaries Multi-purpose Cooperative ng Purok Pag-asa sa Barangay Kamuning, Asuncion, Davao del Norte ang eroplano na kanyang pinapalipad.
Naganap ang pagbagsak dakong alas-8:00 ng umaga nitong nakalipas na Linggo habang nag-i-spray ng kemikal sa nasabing banana plantation.
Ang eroplano na may body number RPR 191 ay pagmamay-ari ng Mactan Aviation.
Maraming beses na ring bumagsak ang kagayang eroplano habang misyon ang pag-spray ng kemikal sa mga banana plantations.
Read More

ZAMBOANGA CITY – Namatay ang isang pulis makaraang saksakin habang nagsisilbi ng warrant of arrest sa tatlong miyembro ng pamilya sa may Barangay Tipan, Gutalac, Zamboanga del Norte.
Batay sa impormsyon mula sa Gutalac municipal police station, kasama ang namatay na pulis na si PO1 Arthur Manait Utong sa binuong Task Force Manhunt ng nasabing istasyon na humahabol sa mga wanted na may warrant of arrest sa kanilang area of responsibility.
Dakong alas-5:50 ng umaga nang isinagawa ng grupo ang operasyon laban sa wanted na mag-asawang sina Benigno Casipong at ang misis nitong si Virginia Casipong at ang anak nilang si Dorie Casipong na nahaharap sa mga kasong qualified theft.
Nang pumasok umano sa bahay ng mga suspek ang tropa ng mga pulis ay biglang sinaksak ni Dorie Casipong ang nasabing pulis na tumama sa kanyang tiyan.
Sugatan din ang suspek nang mabaril ng nasaksak na pulis habang nakatakas naman ang kanyang mga magulang.
Deniklarang dead on arrival ng mga doktor ng Labason District Hospital ang pulis.
Kasalukuyan namang naka-confine ang nabaril na suspek sa Liloy District Hospital.
Inaresto rin ng mga pulis ang kapatid na babae ng sugatang suspek na kinilalang si Virgilia Casipong dahil sa kasong obstruction of justice at ngayon ay nakakulong na sa selda ng Gutalac municipal police station.
Samantala, patuloy ang paghahanap ngayon ng kapulisan sa tumakas na mag-asawa. (MRDS)
Read More

LEGAZPI CITY – Patuloy ngayon ang ginagawang imbestigasyon ng mga otoridad kung ano ang naging dahilan sa nangyaring sunog sa isang paaralan sa bahagi ng Ligao City sa Albay.
Una rito, bandang alas-11:00 kagabi nang magsimula ang apoy sa isang silid-aralan hanggang sa kumalat ito sa iba pang katabing gusali sa Tinago Elementary School, Barangay Tinago sa nasabing lungsod.
Sa ipinaabot na impormasyon sa Bombo Radyo Legazpi, napag-alaman na nakita na lamang ng mga residente na malapit sa lugar na tinutupok na ng apoy ang paaralan.
Halos tatlong malalaking classrooms ang naabo habang nadamay din ang iba pa.
Sa ngayon, hindi pa masabi kung magkano ang kabuuang pinsala sa nangyaring sunog habang inaalam din kung ano ang maaaring pinagmulan nito.
Problema naman ngayon ng pamunuan ng paaralan kung saan magkaklase ang mga apektadong mga mag-aaral.
Read More

CEBU CITY � Isasailalim sa stress debriefing ng Department of Social Welfare and Development (DSWD-7) ang mga anak ng isang ginang na bumaril-patay sa kanyang mister dahil sa selos sa sitio Cambiohan, Barangay Marigondon, Lapu-Lapu City, Cebu.
Ang biktima ay nakilalang si Samuel Sollano, 47, habang ang suspek naman ay si Aida Sollano, 41.
Ayon kay SPO1 Allan Pantaleon ng homicide section, nagseselos ang asawa sa kanyang mister dahil sa palagi itong gabi na kung umuwi sa kanilang bahay.
Sinasabing nalaman din ng ginang na may maraming simpack ang kanyang asawa na siyang ginagamit umano nito sa pambababae.
Nang umuwi ang mister ay mistulang nag-aapoy sa galit ang kanyang misis hanggang sa magkasagutan ang dalawa.
Dito na kinuha ng suspek ang kanilang baril at pinaputukan sa leeg ang mister sa harap mismo ng kanilang mga anak.
Napag-alaman na may siyam na anak ang mag-asawa at dalawang buwan ding buntis ang nakakulong ngayon na misis.
Read More

LEGAZPI CITY – Malaking problema ngayon ng isang kolektor at agent ng mobile phone enterprises sa lungsod ng Legazpi makaraang maholdap at matangay ang lahat ng kanyang kinita.
Kinilala ang biktima na si Sandy Acuña y Peria ng Barangay Bitano, Legazpi City.
Sa kwento nito, papauwi na siya kagabi sakay ng kanyang motorsiklo nang bigla na lamang itong harangin ng isa pang motorsiklo na may angkas na dalawang hindi kinilalang mga suspek.
Agad itong nagdeklara ng holdap kung saan tinutukan siya ng hindi malamang kalibre ng baril.
Dahil sa takot naibigay niya ang hawak na bag na naglalaman ng aabot sa P100,000 na cash at dalawang unit ng cellphone.
Sa imbestigasyon lumalabas na posibleng natunugan ang biktima hanggang sa makakuha ng tiyempo ang mga suspek.
Sa ngayon nagpapatuloy pa ang imbestigasyon ng mga otoridad kaugnay ng pangyayari.
Read More

Share and Enjoy

  • Facebook
  • Twitter
  • Delicious
  • LinkedIn
  • StumbleUpon
  • Add to favorites
  • Email
  • RSS

Posted in | December 28, 2010

Pinoy Balita News Online is powered by Wordpress | WordPress Themes

EmailEmail
PrintPrint
WP Socializer Aakash Web