Philippines Fresh News

DAGUPAN CITY-Kinumpirma nen P. Supt Christopher Abrahano hepe na Dagupan City PNP ya miyembro na Special Action Force ed camp crame so suspek ya amaltog ed sakey ya barangay kagawad dya ed siyudad.

Lapud kinen Abrahano ya natan et aantaen da ni no say paltog ya inusar na suspek ya si P03 Oliver Nicanor ,member na SAF, tan ibabagan bodyguard nen Vice Mayor Belen Fernandez et say inisyon service firearms ed sikatoet say inpamaltog tod say biktiman si Brgy Kagawad Alvin Agusto , 39 anyos ya residente na Brgy. Lucao Dagupan kayari dan manrambolan ed sakey ya restaurant.

Say pagiging SAF member ni labat so akumpirma da tan kaplesan da nen beberipikaen no aaet bodyguard nen Fernandez.

Akauna ed saya at awalaan na aga pantatalusan na sarayan dwa unong labat ed lingedan ya nansumpal ed rambulan tan agawan na paltog ya nansumpal ed inpakapaltog nen Nicanor kinen Agusto ed bekkeng gamit so kalibre 45 na paltog.

DAGUPAN CITY – Inatey so sakey ya kargador kayarin sinasaksak na kainuman ed baley na Lingayen.

Akabatan so biktima ya si Orlando Arquiza, wadyad uston taon ya residente na Sitio Aplaya Pangapisan North.

Lapud say impormasyon intagar kunu na suspek ya si Don Miguel Domalanta so biktima umpan man inuman.

Anengneng ni mismo na live in partner na biktima so insedente. Aanapen la natan so suspek ya timakas kayari na insedente.

DAGUPAN CITY – Inaresto so sakey ya laki diad ginawan buy bust operation diad Herero Perez, ciudad na Dagupan.

Kinabat so naaresto ya si Kalid Mawalil, 34 anyos, taga Bungao, Tawi-Tawi tan manaayam diad Sitio Kamandag, barangay Bonuan Gueset.

Naaresto so suspek kasumpalan ya nanpanggap ya pusher buyer so sakey ya kabiangan na PNP.

Nen nawalaan la na derewan na kuwarta tan droga insan inaresto so suspek.

Nala ed kustodiya to so 2 sachet na shabu tan mark money ya P500.

Akagetar ta isegepan na kaso so suspek. Diad ginawan inpantepet ed say suspek , imburi ton gawa to so narel ed sikaton isesebel ya tambal.

DAGUPAN CITY – Arestado so sakey ya miyembro na Special Action Force (SAF) ya paninisyaan na bodyguard na unbabatik ya alkalde kayarin nasangkot ed rambolan tan napaltog so sakey ya brgy kagawad dya ed siyudad na Dagupan lapud say impormasyon, mamangan na ice cream so suspek ya si P03 Oliver Nicanor, member na SAF, tan ibabagan bodyguard nen Vice Mayor Belen Fernandez ed sakey ya restaurant ed abetlan lugar tan say biktiman si Brgy Kagawad Alvin Agusto , 39-anyos ya residente na Brgy. Lucao Dagupan et wadman met ed lugar kaiba so arum ni ran kakaaro to umpan iselebra so sakey ya okasyon.

Nanlingesan eran dwa ya nansumpal ed aga pantatalusan ya nansumpal ed sakey ya rampol.

Nanpakabat ni ya pulis so suspek ya aga met pinanisyaan na biktima ta aga iya aka uniporme.

Nan agawan ni na paltog so suspek tan biktima ya nansumpal ed inkatama ed bekkeng nen Augusto.

Tampol iyan inbatik ed patmabalan tan say suspek ed wadyad kustudiya la na kapulisan tan naarap ed kaukulan na kaso.

DAGUPAN CITY – Maliket so Provincial Government ed panwalaan na zero drowning incident ed Lingayen Gulf dyad panaon na panseselbra na Pistay Dayat 2013.

Lapud kinen Avernix Arenas Pinuno na Provincial Disaster Risk Reduction and Management Council ya resulta iya na malet ya panbabantay na saray totoo na PDRRMC water Search and rescue team ya 24 oras ya akaantabay ed saray beach goers ya uunla tan manaames ed lugar.

Pati ed saray arum ni ran coastal areas ed luyag et anggapo met kunu so naitatala dan insedente na pankalener.

Pruweba kunu tonya na pati saray beach goers et unuuner la ed ipapatonton na batas umpan nasiguro so kaligtasan da.

Natan unong ed kinen Arenas ya kaplesan ni so gagawen dan panbabantay ed baybayin na Lingayen Gulf anggad mansumpal so inkasa dan Oplan Sumback ya manbayag anggad Hunyo 2.

DAGUPAN CITY—Naaarap ed kason rape so sakey 18-anyos ya balolaki kasumpalan ya narel ed akto na mitatalik ed 13-anyos ya dalaginding diad loob na banyo ed abong na biktima diad baley na San Jacinto diad luyag na Pangasinan.

Abangon so ina ya dalaginding pasado alas-dies kalabian nen nangngel to so ingal diad loob na banyo da kanian apilitan iyang nengnengen.

Abigla iya nen anengneng to so labos-lakseb ya anak to kaiba so balulaki ya mangagawa na milagro diad loob na banyo da.

Lapod saya inpaerel da ed pulis so laki legan na inawit da ed Region I Medical Center diad syudad na Dagupan so dalaginding pian ipanengneg da iya ed doktor.

Natan desidido so pamilya na bii ya mangisegep na kaso balet depensa na suspek agto kuno pinilit so dalaginding lapod sikada edy mankarelasyon.

DAGUPAN CITY – Initdan na Department of Justice (DoJ) anggad Mayo 10 piyan unarap ed preliminary investigation nilirad kason murder ira di Pangasinan Governor Amado Espino Jr. tan Congressman Boying Celeste.

Onong ed kinen atty. John Bigay, sakey ed saray legal counsel nen Gov. Espino, kinerew dad DoJ panel ya ikuntang so pandengel ed kaso ta alagaren ni so iyarap met nen Zambales Gov. Hermogenes Ebdane Jr. diad DoJ ta piyan napanaralan so affidavit na gobernador.

Kaleganan tonya, imporek nen Bigay ya imposiblen ipaaresto si Espino ante na eleksyon.

Immuna ed saya, inisnab di Espino tan Celeste so inpanpatawag ed sikara karuman na DoJ piyan unarap ed preliminary investigation tan imbes nansumiti na counter affidavit iraya piyan ibasura so kason insegep ed sikara.

No nanonotan, insegepan na kason murder ira di Espino tan Rep. Boying Celeste lapud aligasyon ya walay koneksyon dad inpanpatey ed kinen Infanta Mayor Ruperto Martinez nen December 15, 2012.

DAGUPAN CITY – Kaplesan ya nagagawa so Bancaparada, bilang major event diad pagsisilibra na Pistay dayat natan ya agew diad luyag na Pangasinan.

Onong ed report, mas dakel so entry na fluvial float natan ya taon kumpara nen imbeneg ya taon.

Ginmapo so paligsaan diad barangay Bantayan, Lingayen tan mansumpal diad Barangay Banyaga ed baley na Bugallon.

Akabatan ya anggano say health sectors akila diad Bancaparada.

Diad sangkasamputan ya walan nilista, wala ed 145 so nanpalistan participants.

Iilaloan ya naaaruman ni so unsali ta dakel ni so unsasabin partisipante.

DAGUPAN CITY – Lapud say pantankan pantakew na semento, pinaltog na sakey ya security guard so sakey ya managtakew ed Barangay Barangobong dyad baley na Tayug.

Kaplesan na oobserbaan natan so biktima ya si Marvin Padillo, wadyad uston taon lapud say tama na bala manlapu ed 12 gauge shot gun ya inusar na suspek ya si Phillip Andrew ,24-anyos, security guard ya residente na Barangay Pantol ed baley na Bayambang.

Lapud say impormasyon, narel kunu na suspek so biktima ya lalaen so sakey ya sako na semento dahilan umpan aya et paltugen da.

Tampol met ya inbatik ed patambalan so biktima umpan lapatan na lunas tan kaplesan so gagawen na imbestigasyon ed abetlan insedente.

DAGUPAN CITY – Sinampaan na kason malversation of Public Funds so datin tresurera na baley na Balungao lapud say naandin ponso na munisipyo ya mankantidad ya P8.3 milyon.

Dyad pimaway ya report na Commission on Audit masulok ya 8.3 million so cash shortage ed say payroll tan pretty cash nen 2010.

Naantaan na manlapu nen imbestigaan iya na COA et aga la limoob tan nanpanengneng si Marivic Ulpindo, datin tresurera nnha baley ya paninisyaan na linmad aru ya bansa umpan manamot.

Aminado met si Ulpindo ya baleg ya kantidad so kwartan nababalang balet inpasuot ton si Mayor Philip Peralta so nangangan ed sikato ya mangipaway ya kwarta.Kwanto ya no mannepeg iya na kwarta et sikato so igagangan ton mangipaway na kwarta.

Malet met yan inburi nen Peralta tan ed katuwaan et angetelak ni kunu na sulat si Ulpindo dyad drawer to antes ya inalis na bansa.

Akaiyan ed sulat tonya so pankerew na despensa tan nankumpurmisan salatan so kwarta no makapntipon la.

Maninisya met si Peralta ya politically motivated so paratang laban ed sikato.

DAGUPAN CITY – Asugatan so apatiran totoo kaiba so taluran menor de edad ed karambola na taluran luganan ed baley na San Fabian.

Akabatan so biktima ya si Jayson Centino, wadyad uston taon tan residente na Perez Market Site dya ed siyudad na Dagupan, Radz Lawrence Madriaga, 4; Sofia Monique Madriaga, 8;
at Princess Daisy Madriaga, 17, ya parehon residente na Barangay Lipit Tumeeng ed abetlan baley.

Lapud say impormasyon, akatunda so luluganan na tricycle na saray biktima tan say sakey nen tricycle dyad kukumpuniin na luganan nen nabangga iya na katumbukan na pick up ya mamanehuen nen Priper Sendaydiego , wadyad uston taon tan residente na Barangay Sagud Bahley San Fabian.

Resulta iya na panwalaan na sugat tan pasa ed nanduruman parte na laman na saray biktima ya insugor ya tampol ed patambalan umpan natambal.

DAGUPAN CITY – Inebatan nen Pangasinan governor Amado EspinoJr. so unkakalat ya balita nilirad akagetar ya panaresto ed sikato lapud saray kakaarapen ton insegep dan kaso ed sikato.

Mismon saray atatagey ya opisyal ya nanlapud Department of justice so ibabagan unsabi natan ya agew diad luyag piyan ipaaresto si Espino.

Onong balet ed kinen Espino, akatarya yan arapen so antokaman ya nagawa.

Kaleganan tonya, akatarya yan unlad Manila piyan unarap diad preliminary investigation na Department of Justice.

No nanonotan, insegepan na kason murder ira di Espino tan cong. Boying Celeste lapud ibabagan walad benegan na impanpatey ed kinen Infanta Mayor Ruperto Martinez tan kason plunder met lapud aligasyon ya impangibulsa na kuwarta ya nanlapud jueteng.

Likod ed saya, balak met uan isegepan na kason illegal detention tan disqualification case.

DAGUPAN CITY – Matalonggaring so ginawan free concert free tshirt ya intarya na Bombo Radyo tan Star FM diad Bangus Festival ya ginawa kalabian diad Dagupan City Plaza.

papadisiran ya labin limang libong totoo so nanbantay ed say bandang Rocksteady untan met saray local band ya , Sound of Era, the Elements tan grupon Chika Babes.

Agay lay liket na saray nanbantay lapud say inter ya libren t-shirt, CDs, tan kape. PInaliket met na saray na bombo radyo tan star FM iray nanbantay diad panamegley na simplen pakontest ya walay premyon gift pack ya nanlapu ed saray sponsors.

Say concert so pikakasakey na Bomboradyo ed tinaon ya pansisilibra na Bangus Festival diad ciudad na Dagupan.

Kaleganan tonya, tampok met natan ya agew so Guilon Guilon o street dancing competition tan nabuas may tatalaranan ya Kalutan ed dalan o pankalot na bangus diad karukuyan na AB Fernandez Avenue angga ed Dagupan City plaza.

DAGUPAN CITY – Mantutumbukan tan dire-diretso so gagawen na conference na Pangasinan PNP kaugnay na 2013 May midterm election.

Unong ed kinen S/Insp. Ryan Manongdo, Public Information Officer (PIO) na Pangasinan PNP ya akagetar la ra so gawin na panpupulong misesengeg ed eleksyon umpan napantontongan so saray stratehiya ya posiblen salatan umpan lalon nabantayan so seguridad na publiko dwaran ismba antes ya unsabi so panaon na eleksyon.

Mansansiya kunu so ipapatonton na stratehiyan maximum police vissibility tan seguridad, antes tan kayari na agew ya eleksyon.

Kaugnay tonya et inbaga met nen Manongdo ya unong ed agawan gulo ed baley na Mangatarem tan San Manuel kayari na ginawan political rally, et mangiyan era na maximum police visibility ed amin na aktibidad umpan nasiguro so seguridad na saray kandidato pati isay publiko.

DAGUPAN CITY – Say miyembro labat na PNP so nanparehistro ed gawaen na Local absentee Voting ya nagawa nabwas ya Pangasinan Police Provincial Office.

Unong ed kinen Atty Erickson Oganiza Election Officer dyad ed siyudad na Dagupan ya aasaan na 45 miyembro na kapulisan so unla nabwas ed PPO umpan onboto.

Ungapo so LAV alas otso na na kabwasan tan mansumpal na alas sinko na ngarem. Balet unong ed daeset ya bilang na saray botante et posible kunu ya mansumpal iya na mas masapbay.

Kayarin unboto iyan so balota da ed sakey ya envelope tan ikustudiya iya na opisyal ya man una ed botoan. Ipawit iya ed Comelec tan ed mismon agew na eleksyon et ibansag so panbilang na boto da.