Philippines Fresh News

Tacloban City – Patay an duha nga guintutuohan nga mga miyembro han New People’s Army (NPA) ha natabo nga engkwentro ha butnga han mao nga grupo ngan han mga militar ha Brgy. Albalate, Catbalaogan, Samar.

Subay ha nakuha nga impormasyon han Bombo Radyo Tacloban tikang kan Col. Leo Madronal, chief military officer han 8th Infantry Division (ID), nagdudumara hin Peace and Development Team an tropa han 87th Infantry Battalion (IB) han makatapo han mga ini an lima nga mga rebelde hirani ha mao nga lugar kun diin dayon nga nagbalyuay hin buto an duha nga grupo nga nag iha tubtob 15 minutos nga nagin hinungdan han pagkamatay han 2 nga mga rebelde.

Dugang pa han mao nga opisyal nga nakakalagiw naman daw an tulo nga iba pa nga mga kaupod hini samtang waray naman nahipatik nga namatay o nasamaran ha kampo ng gobyerno.

Narekober naman han mga militar ha nahitabuan han insidente an 1 M16 rifle, baby armalite, 1 back pack ngan pira nga mga personal nga mga higaamit.

Samtang, guinkumpirma naman han usa nga residente ha mao nga barangay nga an mao nga mga rebelde in nagdudumara hin extorsion ha apira nga mga lokal nga kandidato ha mao nga lugar kun diin dati na guihapon ini nga nangotong ha pira nga mga barangay kapitan han nakalabay nga 2010 election.

TACLOBAN CITY – Guinsiguro yana han Department of Agriculture (DA) regional office – 8 nga mas mahitaas pa an suplay han bugas dinhi ha rehiyon otso tikang ha 98% rice sufficient han naglabay nga tuig.

Sumala kan DA Regional Agricultural and Fisheries Information Division (RAFID) chief officer, Francisco Rosaroso guinlalauman nira nga mahitaas pa ha 994,972 metric tons an ani han bugas ha bug-os nga rehiyon kon magkaada hin kooperasyon ha mga parag-uma ngan malinampuson nga implementasyon han ira mga programa.

Nakita naman han DA nga naghitaas an suplay han bugas ha rehiyon tungod ha panhatag hin mga certified seeds ngan fertilizers han ira buhatan ha mga parag-uma nga may panuyuan magamit an mga dekalidad nga mga humay.

Samtang, guinklaro naman ni Rosaroso nga diri pa nakakapagpagawas hin kabug-usan nga produksyon hin bugas tungod nga may ada pa guinlalauman nga harvest ha bulan han Mayo ngan Hunyo yana nga tuig.

TACLOBAN CITY – Iguinreklamo yana han usa nga residente ha Brgy. Pagsulhugon, Babatngon, Leyte an ira kapitan kahuman hiya pagpanununtukon han pagsuspetsahan nga “nanngayat hin away” ha mao nga barangay.

Sumala ha reklemante nga hi Raul Basas, guinsuntok daw hiya han ira kapitan nga guinkilala nga hi Joel Rondina ngan han iya mga body guards.

Dugang pa ni Basas nga bumunot guihapon hin pusil an body guard han kapitan ngan namakeana pa kon papatayon daw hiya, dungan han pagdus-an han iya nanay.

Samtang, pursigido naman nga magpasaka hin kaso an biktima kahuman hiya magpa-mediko legal.

TACLOBAN CITY – Kapot na yana han mga kapulisan an duha nga kalalakin-an nga guinsususpetsahan responsable ha panmusil ha suspendedo nga alkalde han Victoria Northern, Samar nga hi Jose “Rabit” Ardales ngan anak hini nga hi George Ardales, 23 anyos.

Sumala kan P/Insp. Edwin Cañamaque, hepe han Victoria Municipal Police Station, may guin-imbitar na daw hira nga kalalakin-an nga nakatalaan igpailarom ha paraffin test.

Ha inisyal nga imbestigasyon han mga kapulisan, guinsisiring nga daku daw an posibilidad nga may kalabutan ha politika an mao nga panmusil ha mga biktima nga yana in padayon nga nagpapatambal ha pribado nga hospital ha Allen Northern, Samar.

Una hini, guinpa-uranan hin bala an panimalay han mga Ardales hinungdan agud masamaran hi Jose han gumawas ha ira panimalay kaupod an iya anak.

Ha pagkayana in padayon la guihapon an iguindudumara nga imbestigasyon han mga otoridad maypaghisumpay han mao nga insidente.

Tacloban City- Samaran an Mayor han Victoria N. Samar kaupod an usa nga anak hini kahuman nga pagpanmumusilon hin waray pa kakikilal-i nga mga suspek banda alas 8:00 kagabi.

Subay ha inisyal nga impormasyon tikang kan P/Insp. Edwin Ceñalake, han Victoria Municipal Police Station, nagpapatambal na yana hi incumbent Mayor Jose “Rabit” Ardales, kaupod an anak hini nga hi George Ardales, 23, kahuman pagpanmumusilon ha gawas han ira panimalay ha Zone 1, han mao nga bungto.

Ha pagkayana in padayon naman an guindudumara nga imbestigasyon han mga otoridad kon ano an motibo ha mao nga panhitabo, pero diri pa guintatanggal dinhi an posibilidad nga may kalabutan ha politika an mao nga panmusil.

TACLOBAN CITY – Mapripriso hin masobra 2 katuig an tulo nga mga kalalakin-an kahuman nga madakpan hin 3,211.1 ka-board feet hin mga lauan lumber nga nagkakantidad hin P128,444 o pagtalapas ha Section 77 han Presidential Decree (PD) 705, ha Basey, Samar.

Subay ha impormasyon nga iguinpaabot han Department of Environment and Natural Resources (DENR) guinkilala an mga suspect nga hira Avelino Dacuyan, Norman Dacuyan, ngan Ismael Aclao, aada ha legal nga pangidaron ngan papreho mga residente han mao nga lugar.

Iguinsakay daw han mga suspect an mga kahoy tikang ha Barangay Malinao, Taft, Eastern Samar tikanhi ha Tacloban City, gamit an usa nga expired nga permit to transport nga han Agusto 28, 2008 pa.

Iguindig-on naman ni Judge Tarcelo Sabarre an mao nga kaso kahuman nga mahibaruan nga waray isakto nga dokumento an pag-biyahe han mao nga kahoy.

Samtang, nahibaruan naman nga waray sala an lalaki nga hi Dennis Lumagbas kahuman nga mahibaruan nga nakisakay la ini ha nasabi nga sarakyan.

TACLOBAN CITY – Patay an usa nga hubog kahuman nga waray makagawas ha ira balay nga nasunog kanina hin ala-1:50 hin kaagahon ha Barangay 110 Utap, syudad han Tacloban.

Subay ha report, alas-2:25 nadeklara nga fire out an mao nga sunog diin posible daw nga an lamparilya nga gamit han biktima nga hi Ronito Rosal, 45 construction worker ngan residente han mao nga barangay an naguin kawsa han sunog rason agud dagmit ini nga nagsarang ha ira panimalay nga hinimo ha light materials.

Nasabtan naman han mga bombero nga hubog hi Rosal han matabo an insidente.

Samtang, padayon pa nga guintatambal ha Eastern VIsayas Regional Medical Center (EVRMC) an anak han biktima nga guin kilala nga hi Rogine Rosal, 21, kahuman nga masunog an nawong hini.

Ha inisyal nga imbestigasyon han Bureau of Fire Protection (BFP) umabot ha P100,000 an destroso han sunog.

TACLOBAN CITY – Patay an usa nga barangay chairman ngan samaran naman an anak hini kahuman nga pauranan hin bala hin lima nga mga suspek nga nakasakay ha duha nga motorsiklo ha Purok 1, Brgy. Matobato, Calbayog City Samar.

Ha nahikay nga impormasyon han Bombo Radyo Tacloban, guinkilala an namatay nga biktima nga hi Brgy. Chairman Amado Lauyon, 49, residente han Brgy. Bagong Lipunan kon diin nakaangkon ini hin mga igo hin bala ha magkadurodilian nga parte han lawas, samtang samaran naman an anak hini nga hi Rendo Lauyon, 24 nga nadaplisan hin duha nga bala hin pusil.

Sumala kan PO2 Pedro Sumbisi Jr, investigator ha mao nga kaso, nakamotorsiklo an magtala-amay tikang ha Brgy. Trinidad, ngan tigda ini nga guinpanmumusil han mga suspek.

Nadakop naman an duha nga suspek nga hira Reynaldo de Alagdon alyas Bulon, residente han Brgy. Hibatang, Calbayog City, ngan Eddie Fermino Alyas Bulondoy, residente han Brgy. Bagong Lipunan, ngan padayon naman an manhunt operation han mga otoridad ha tulo pa nga suspek nga nakatakas.

Samtang, iguinpahayag naman han nakatalwas nga biktima nga personal grudge an motibo han panmatay.

TACLOBAN CITY – Nakatalaan na nga iglubong yana nga Huwebes an patay nga lawas han 4 anyos nga bata kahuman nga mahulog ha bubon ha Barangay Cogon, San Jose, Tacloban City.

Subay ha blotter han mga kapulisan, mag-uusa kaadlaw na daw nga guinbibiling han amay nga hi Henry Solidad, 32-anyos han nasabi nga barangay an iya anak nga hi Jasmine Solidad kahuman nga waray na ini umuli ha ira panimalay.

Dugang pa hini, nahibaruan nira nga nalunod an ira anak han may ada magsumat ha ira bahin hini kon d iin nauna daw an ulo han bata han mahulog ini.

May nagsiring naman nga nakikipag-inum daw an nanay han biktima ugsa pa man mahulog hi Jasmin ha bubon nga may kahiladmon nga usa kametro.

Tacloban City – Nagpatapod hi Presidente Benigno “Noynoy” Aquino III nga ha maabot nga tuig 2016 in masosolusyunan na an problema ha kakaulangan han classrooms ha bug-os nga nasud.

Ini in guinpahayag ni Presidente Aquino durante han iya pag atubang ha maabot 8, 000 nga mga lider ngan miembro han komunidad ha Calbayog Sports Complex.

Guinsiriguro guihapon han mao nga Presidente nga ugsa pa man mahuman an tuig, magkakaada na daw hin supisyente nga suplay hin bugas an Pilipinas ngan guinhihingita daw guihapon han Department of Agriculture (DA) nga makapag-export na hin bugas ha iba nga nasud.

Samtang, iguindasig naman ni PNoy an pagdamo han benipisaryo han programa han gobyerno nga Pantawid Pamilyang PilipinoProgram (4Ps) kun diin an anay 800 mil nga benipasaryo in umabot na ini yana ha 3.9 milyon.

Una hini, manunumduman nga bumisita guihapon hi Aquino ha Catarman ugsa ini kumadto ha syudad han Calbayog kon diin iya guinpangunahan an pag inugurar han P58 milyunes Maguino-o Port Project han Philippine Ports Authority nga kaparte han Department of Transportation and Communication o DOTC ngan dumiretso na ini ha Maasin City.

Kaupod naman ni Presidente Aquino hira DILG Sec. Mar Roxas ngan DOTC Sec. Jun Abaya ha pagbisita dinhi ha Sinirangan Bisayas.

TACLOBAN CITY – Nakatalaan nga pasakaan yana hin kaso an re-electionista nga incumbent councilor ha Tanuan, Leyte kahuman nga daw tutukan hin pusil an iya kalaban ha pulitika, nga nadalagan kumo konsehal ha mao nga bungto.

Sumala ha biktima nga hi Engr. Harold Gomez, nadalagan kumo konsehal han mao nga bungto, guintutukan daw hiya hin pusil han kalaban nga incumbent konsehal nga hi Atty. Mario Villero, kahuman hiya pag-suspetsahan nga nagbuho han goma han sarakyan hini.

Labot la ha panunutok in nagpabuto daw guihapon hin pusil an suspect ha headquarters han UNA party nga partido naman han reklamante.

Dugang pa ni Gomez nga posible niya pasakaan hin kaso nga grave threat ngan alarming scandal an suspek.

TACLOBAN CITY – Patay an usa nga babaye nga guinkilala nga hi Maricris Salazar, 37-anyos, residente han Sitio Candungos, Barangay Malobago, Marabot, Samar, kahuman ini nga pagpanunun-tukon han iya asawa nga hi Jonathan Bagual, 29-anyos.

Subay ha nahikay nga impormasyon han Bombo Radyo Tacloban, mismo an suhag nga anak han mag-asawa nga hi Mark Jun, an nakakita han pangastigo han amay ha ira nanay nga guinsususpetsahan hinungdan han pagkamatay han biktima.

Ugsa matabo an krimen, guinmanduan daw han biktima an suspek nga kuhaon an bugas ha ira amyaw pero waray ini tumugot lugod guinsuntok hin pira kabeses an iya asawa.

Ha pagkayana in kapot na han mga otoridad an suspek ngan padayon nga guin-iimbestigaran an mao nga panhitabo.

TACLOBAN CITY – Naatubang yana ha patong – patong nga kaso an usa nga retirado nga pulis general nga Lebanese mahuman nga daw man-abuso ha usa nga ulitawo denhi ha syudad han Tacloban.

Sumala ha mga kapulisan, maatubang ha kaso ha daw pagtalapas ha RA 9208 o Anti-trafficking of Persons ngan RA 7610 o Special Protection of Children Against Child Abuse, Exploitation and Discrimination Act an Lebanese national nga hi Jahmil Ahkil, 55, retirado nga pulis general ha Erkay, Lebanon.

Una hini, nag-reklamo ha mga kapulisan hi Ahkil kataliwan nga daw pangawatan hiya hin P30,000 ngan $2,000 han 16-anyos nga ulitawo han Esperas Avenue ngan Edmark Laureno, 19, han Barangay 48 Magallanes, nga daw uyab han lebanese.

Nahibaruan naman ha prisuhan han mga kapulisan an pan-aabuso han suspek mahuman nga aminon han mga biktima nga daw guin-abuso hira han langyawanon kabalyo hin kwarta ngan pira pa nga mga mahalon nga butang.

TACLOBAN CITY – Guin papreso yana han usa nga lalaki an iya manghod nga bugto kahuman nga ayaton hini an ira tatay hin “suntukay” ha Barangay 68, Anibong, Tacloban City.

Subay ha blotter han mga kapulisan, hubog daw an suspek nga hi Rene Paul Lagario, 25, dida han ayaton hini an iya tatay, butang nga guin balabgan naman han kuya hini nga hi Amboy Lagario, 27, nga mga residente han mao nga barangay.

Dugang pa ni Amboy nga deri niya gusto magkaada hin away an iya bugto ngan an tatay rasun agud ipapreso niya an iya manghod.

Samtang, waray naman daw pudngi han tatay an guin buhat nga pagpapreso han iya anak ngadto han manghod hini.

Ha pagkayana in aadto na ha Tacloban City Police Office Office (TCPO) lock-up cell an bata nga Lagario.

TACLOBAN CITY – Kritikal yana an 19-anyos nga tomboy kahuman nga bun-on hin ice pick han iya barkada tungod la daw hin jacket, ha Brgy. 83-C Taguictik, San Jose, Tacloban City.

Sumala ha bugto han biktima nga hi Joy Abreo, 19 , residente han mao nga barangay, babawion na daw han biktima an jacket nga guin huram han barkada nga guin kilala nga hi alyas “Ranzel” dida han pag-bun-on ini ha tagiliran gamit an ice pick nga dara hini.

Dugang pa han bugto nga deri hiya makatuod nga mabubuhat ni Ranzel an mao nga krimen.

Ha pagkayana in padayun nga guin iimbestigahan han mga kapulisan kun ano an motibo han suspek nga tumakas kahuman an insidente.