Philippines Fresh News

TUGUEGARAO CITY – Nekkarela ta Cagayan Valley Medical Center (CVMC) ta Brgy. Carig, Tuguegarao City y tallu nga taloya ta kabalin nga maaksidente ta Syudad na Tuguegarao.

Base ta report, igga y tallu ta kalsada nga takay ta motorsiklo nga manehuwan ni Randy Taguiam na Lagom, Penablanca kavulu na y back rider na ira nga ira da Jay Soriano,21 na Linao, Tuguegarao City anna Jaypee Pion nga Sto. Nino, Cagayan turi makwa y insidente.

Kaya nga i-overtake ni Taguiam y van nga tuntunugan na ngamme nawawanan iya ta kontrol megafu ta paspas y karela na yatun ta sumabit ta van anna sumimplang ta tricycle nga nakaparada ta dalan y motorsiklo.

Newaki y takay na motorsiklo yatun ta nabigaran ira ta naduma duma nga parte ta baggi da.

Sangaw ay makasowan ta reckless imprudence resulting in physical injuries and damage to property y driver na motorsiklo.

TUGUEGARAO CITY – Inalerto sangaw na Philippine National Police (PNP) y tallu nga ili kontra nga New People’s Army (NPA) nga mappanggap anna macheckpoint.

Iningwa na Regional Public Information Office (RPIO) na PNP Region 2 y nakagi nga aktibidad megafu ta igga y nalawa da nga report nga naggafu ta PNP Rizal nga sabayan kanu na NPA y Comelec checkpoint na pulis ira ta maddaggun nga mekasa nga gun ban.

Base ta RPIO, magangwa da gapa ta checkpoint y NPA ira ta Brgy. Gagabutan, Rizal, Cagayan nu anni ay pagucagan da kanu y pasahero ira ta pagimmangan da nga takay ira.

Kadiyan da nga iyangay da ira ta opisina da.

Megafu taw ay kinadiyanan na pulisya y publiko nga siguraduan da nga lehitimo y checkpoint nga madalanan da tapenu ari nga mabiktima na NPA nga mappanggap ira nga pulis anna suddalo.

Paryan da kanu paga y uniporme na kapulisan anna militar.

Magangwa da gapa yaw ta oplan katok ta gibbalayan ira ..
Kinadiyanan na otoridad nga insigida da nga idanuk kannira nu igga y manggulu kannira nga NPA.

TUGUEGARAO CITY – Arestado y tadday nga bagito nga pulis megafu ta panggulu na ta tadday nga resto bar anna pangontra ta Comelec gun ban ta Tuguegarao City.

Ginafu na PNP Tuguegarao si PO1 Mark Odellon Menor, residente na Brgy. Caggay taw nga Syudad nga naeasign ta PNP Sta. Praxedes ta kabalin nga suntukan anna tutukan na ta palattuk y tadday nga customer na restobar ta Brgy. Balzain East nga si Marlon Ballad na Brgy. Pataguilig, Peñablanca.

Base ta report na pulisya, insigida nga rumesponde y pulis ira nga naka asign ta Compact Don Domingo ta kabalin nga idanuk na biktima yu pangugulu ni Menor turi mellaw yaw.

Reklamo na biktima nga si Ballad, tinunuk iya na suspek nu anne ay sinuntok anna tinutukan iya na palattuk turi mallawan yaw ta comfort room ta establishimiento.

Naddetan paga na rumesponde nga pulis y ari nga nakasta nga kustombre na suspek.

Insigida gapa nga ginafu anna kinumpiska y issued firearm nga caliber 9mm nga neusa na suspek ta biktima.

TUGUEGARAO CITY – Nagafu na otoridad y tadday nga estudynate turi mangilaku ta iligal nga druga ta Tuguegarao City.

Y suspek ay si Reynaldo Nepomuceno, 28 na Sta. Ana, Cagayan.

Nagafu y suspek ta nepakat da nga buy bust operations na Philippine Drug Enforcement Agency (PDEA) anna Philippine National Police (PNP).

Narekober ta suspek y tadday nga plastic sachet nga pakurugan nga shabu, P1,000 nga marked money anna cellular phone nga neusa na ta transaksiyon.

Ta interview na Bombo Radyo Tuguegarao, napanono ni Nepomuceno nga mabbenta ta droga megafu ta gipit iyya ta kuwartu ta kabalin nga naggafu iyya ta on-the-job training ta Laguna ta kurso nga Marine Transportation anna maddaggun y eksaminasyon da.

Igga ana ta kustodiya sangaw na otoridad y estudyante anna iprepara da na y kaso na nga pangontra ta RA 9165 o Comprehensive Dangerous Drugs Act.

TUGUEGARAO CITY – Kinumfirma ni Lt. Col. Alvin Flores, commanding officer na 17th Infantry Battalion (IB), Philippine Army nga nakabase ta Brgy. Masin, Alcala y impormasyon nga nanallung y armado nga grupo na New People’s Army (NPA) ta Brgy. Gagabutan, Rizal, Cagayan.

Ta interview na Bombo Radyo Tuguegarao, kinagi ni Flores nga makakadde ta 30 adde 40 rebelde nga nagpanggap nga suddalo y nattallung ta gibbalayan anna nangikil da ta makan anna ina da y dudduma nga importante nga gamit na residente ira tari.

Base kanni Flores, nakauniporme ta suddalo y NPA ira turi nagangwa da ta extortion ta mazziriga nga residente ira.

Kinagi paga na opisyal nga igga y tolay paga nga negalu na rebelde ira liye nga tumakas da nga nappunta da ta Sinundungan Valley ta nakagi nga ili.

Sangaw ay nagangwa ta tracking y militar tapenu magafu na NPA ira nga nangingikil ta residente ira ta remote barangay ta probinsiya.

TUGUEGARAO CITY – Naka-standby sangaw y Department of Agriculture (DA) Region 2 para ta kuwan da nga cloud seeding megafu ta tuyut nga tiyempo.

Yaw ay tapenu mesalba y 40,000 ektarya nga kammayan anna kamaitan nga madaral megafu ta awan tu uran na.

Base kanni Engr. Rafael Balbuena Jr., senior agriculturist na DA ta Cagayan olu ana nga nagangwa da ta cloud seeding ta water shed areas na Magat dam ta Ramon, Isabela turi Pebrero 7.

Nakaprepara y takay nga usan na DA ana para ta cloud seeding activity tapenu nu kunna ay mapagustuwan y mula ira ta nallelay da na ta kawan na uran.

TUGUEGARAO CITY – Tadday nga vintage bomb y narekober ta Brgy. Maura, Aparri, Cagayan.

Base kanni C/Insp. Romar Pacis, hepe na PNP Aparri, nakokkok y bomba ta kuwan da nga septic tank ta baay na tadday nga Anie Tumaro ta nakagi nga lugar.

Insigida gapa nga nekagi na mattrabahu ta septic tank ta stasyon na pulisya.

Matantiya nga igga ta 350 pounds y dammo na bomba nga pakurugan da nga neusa na Hapon turi World War II.

Sangaw ay tammi ana na explosive ordinance division office na PNP Region 2 y bomba para ta kustu nga angipakapiya taw.

TUGUEGARAO CITY – Nebawal da nga mangipatadak ta sementado nga balay y residente ira na Palui Island.

Nenawak ni Pastor Johnny Francisco nga y 127 pamilya nga marresidente tari nga nebawal da y konstruksiyon na kongkreto nga balay megafu turi nedeklara da nga protected area na DENR.

Namwan nga kukuwa na gobierno y davvun nga dati nga naval reservation.

Kunnattun man ay umaapela ta DENR y marresidente tari nga payagan da ira nga mappatadak ta mas matibay nga paddiyanan da megafu ta puru light materials y balay da tari yatun ta insigida nga madaral nemanno nu igga nasikan nga badju.

Namwan nga tadday y Palaui Island ta kanayun nga kannan na naassikan nga badju.

TUGUEGARAO CITY – Inireklamo ta stasyon na pulisya y 16-anyos nga katulung y amo na megafu ta pangmomolestiya sa ta Syudad na Tuguegarao.

Base ta reklamo na biktima ta otoridad, kuwan na y pangmomolestiya na suspek nga si Erick Cabrera ta biktima nu mattallung y ana na ira ta eskwelahan.

Reklamo na minor de edad, ommukkan anna tammi na suspek y maseselan nga parte na baggi na nu awan tu kavulu da ta balay da.

Patakitan paga iya na amo na.

Tantalawan paga iya na suspek ngamme nassikan y unak na nga idanuk ta otoridad megafu ta pang-aabuso na suspek ta biktima.

TUGUEGARAO CITY – Dead on arrival ta Cagayan Valley Medical Center (CVMC) ta Tuguegarao City y 52-anyos nga lalaki ta kabalin nga duddugan na kainuman na ta Iguig, Cagayan.

Y biktima ay si Federico Ruma anna y suspek ay si Gilberto Ramos, 49-anyos parehu nga residente na Brgy. Minanga Norte, Iguig.

Base kanni SPO1 Wilfredo Barizo, case investigator, ninay ta birthday party ta nakagi nga lugar y duwa anna nagerenuman ira.

Ngamme ta kabalin nga nagerenuman ta nakagi nga okasyon ay netuluy da y ninum ta tadday nga videoke bar ta Brgy. San Esteban kavulu da y dudduma paga nga kainuman da.

Turi maddaggun da nga ninum ay gavva nga inaranyan anna sinuntuk na y biktima nga igga ta tanakwan nga lamesa.

Kinurak gapa ira na manager na videoke bar nga si Maricel Quintayan anna nelawan y biktima.

Ngamme ari da nga natageno nga timinunuk si Ramos anna dinnudduk ta namidwa ta tagang na anna tadday ta sinay na biktima gamit y tadday nga ditchal nga gafu na pappatay na.

Nagafu gapa na rumesponde ng pulis y suspek nga pinurban na y mattakas ta kabalin na krimen.

Sangaw ay nakafuku ana ta Bureau of Jail Management and Penology (BJMP) Cataggaman y suspek nga nepay da ta inquest proceedings ta kaso na nga murder.

TUGUEGARAO CITY – Nagafu y tallu nga tolay ta nepakat da nga buy bust operation na Philippine National Police (PNP) anna Philippine Drug Enforcement Agency (PDEA) ta Solano, Nueva Vizcaya.

Inamwan ni C/Supt. Rodrigo De Gracia, director na PNP Region 2 y suspek ira nga ira da Moises Gaco, 37; Eduardo Dela Cruz, 44 anna Abay Datu, 24 parehu nga residente na nakagi nga lugar.

Base ta report, nakalawa da ta report nga mangiyusa ta iligal nga druga y suspek ira ta tadday nga apartment ta Solano nga inupahan da yatun ta insigida da nga nekagi ta PDEA.

Nalak da ta tallu y tallu nga piraso na tig-P1,000 nga neusa da nga marked money na otoridad ira, lima nga piraso na heat sealed plastic sachets na shabu nga nakaekwa ta container, drug paraphernalia anna tadday nga caliber 45 na palattuk.

Sangaw ay nakafuku ana y suspek ira ta kabalin nga kasowan ana ira ta pangontra ta RA 9165 o Comprehensive Dangerous Drugs Act ta provincial prosecutors office ta Bayombong, Nueva Vizcaya.

TUGUEGARAO CITY – Nakakadde ana ta 84 nga palattuk y nessurender da ta Philippine National Police (PNP)Region 2 ta tuluy nga operasyon na oplan katok base gapa ana ta kampanya kontra boga o loose firearms.

Y nangisurrender ira ay y pulitiko, private individual, brgy opisyal anna government employee.

Y naporyan nga nekivu ta Regional Operations and Plans Divisions na Police Regional Office (PRO) 2 ay y 24 nga naduma duma nga palattuk nga nediposito ta PNP Buguey.

Yaw y pangtunuk da ta oplan katok na PNP nu anni ay nekagi da ta gun owners nemanno y nabalin ana y kontrata na ta firearms license nga isurender da na ta pulisya megafu ta maddaggun y gun ban tapenu ari da meusa sonu eleksyon.

Kinagi gapa ta Bombo Radyo Tuguegarao ni S/Supt. Atty. Rufino Jefrey Manire, deputy regional director for operation na PNP Region 2 nga nakakadde ana ta mafulu nga naduma duma nga armas anna granada y nagafu na kapulisan adde turi nepakat da y election gun ban turi Enero 13.

Nappabalo gapa y PNP Region 2 megafu ta tumunuk y gun enthusiast ira nemanno y pulitiko ira.

Siniguro paga na pulisya nga itoli da y nesurender da nga palattuk nga igga y kompleto nga dokumento na ta kabalin na eleksyon gun ban ta hunyo.

TUGUEGARAO CITY – Arestado y tadday nga babay megafu ta pangilaku na ta peke nga alahas ta Syudad na Tuguegarao.

Y suspek ay si Mary Bancud, 51, na Linao East taw nga siyudad.

Namwan nga mangilaku ta gold nga kwintas anna bracelet y suspek ngamme nasimwan nga peke ira y ilaku na ta kabalin nga ipasita na buyer na y klase na alahas nga laku na ta otoridad.

Megafu taw ay nedanuk da ta pulisya nu anni ay ginafu ana iya na rumesponde nga pulis ira.

Namwan nga igga dati ana nga kaso nga swindling o panggagantso y suspek turi 2009.

Sangaw ay nakafuku ana ta Compact Don Domingo y babay nga nakasowan mangngana ta kaso nga swindling.

TUGUEGARAO CITY – Tadday y Bombo Radyo Tuguegarao ta mapremyowan ta anibersaryo na Department of Social Welfare and Development (DSWD) sangaw nga algaw.

Yaw ay kinagi ta Bombo Radyo ni Angelie Lobo, information officer na DSWD Region 2.

Kinagi i ni Lobo nga iddan da ta plaque of recognition y Bombo Radyo Tuguegarao megafu ta aktibo yaw nga kavulu na DSWD ta pangiasikasu ta adbokasiya da tapenu malabanan y krisis ta Nation tam.

Y nakagi nga premyo ay iddan na nakagi nga ahensya ta programa da sangaw nga algaw megafu ta aniversary da sangaw ta University of Cagayan Valley (UCV) gymnasium.

TUGUEGARAO CITY – Nagafu y tadday nga kusetyeru ta kabalin nga mappaputok ta ari nga lisensiyado nga palattuk ta ili na Baggao, Cagayan.

Y suspek nga si Artemio Orbistondo Jr., 47, ay residente na Brgy. Lasilat, Baggao.

Base ta report, sinita na tadday nga Leon Mina y suspek megafu ta pappaputuk anna panammi na ta palattuk ta lawan na balay da nga namegafu ana y Comelec gun ban.

Ngamme nalussaw si Orbistando nga narresulta ta gungu da adde ta ninay y brgy. opisyal kavulu si SPO4 Francisco Vuelta Jr. na PNP Baggao tapenu kayan da ta suspek nga nellaw yaw nga isurender y palattuk na yaw nga cal. 5.56 mm.

Base kanni SPO1 Amado Orpilla, case investigator awan tu lisensiya na palattuk na suspek yatun ta ginafu iya na otoridad.

Nakasowan y suspek ta pangontra ta nepay nga election gun ban anna panammi ta ari nga lisensiyado nga palattuk.

Sangaw ay nakafuku ana ta Bureau of Jail Management and Penology (BJMP) ta Cataggaman, Tuguegarao City y suspek.